Atyraýdaǵy órtte kúıip qalǵan áıel men 3 jasar balanyń jaǵdaıy áli de aýyr

<p>ATYRAÝ. KAZINFORM &mdash; Atyraýda turǵyn úıde gaz-aýa qospasy jarylyp, bir otbasynyń 5 adamyn kúıik shalǵan edi. Oblystyq aýrýhananyń jansaqtaý bólimine túsken erli-zaıyptylar men úsh aılyq sábı kóz jumdy. Qazir jansaqtaý bóliminde jatqan áıel men 3 jasar balanyń jaǵdaıy áli de aýyr kúıde qalyp otyr.</p>

Atyraý oblystyq densaýlyq saqtaý basqarmasynyń baspasóz qyzmetinen málim etkendeı, oblystyq aýrýhananyń jansaqtaý bóliminde 2001 jylǵy áıel jatyr. Al, oblystyq aýrýhanasynyń jansaqtaý bóliminde 3 jasar bala bar.

«Naýqastardyń jaǵdaıy áli de aýyr. Olar aýrýhanalardyń jansaqtaý bóliminde jatyr. Ázirge eshqandaı ózgeris joq. Dárigerler naýqastardyń jaǵdaıyn baqylaýda ustap otyr», - dep habarlady basqarmanyń baspasóz qyzmeti.

Eske sala keteıik, 2 qańtarda Atyraýda turǵyn úıde gaz jarylyp, 5 adamdy kúıik shaldy.

Turǵyn úıdegi gaz-aýa qospasynyń dúmpýinen soń órt tutanǵan. Dúmpýdiń saldarynan turǵyn úıdiń 9 sharshy metr qabyrǵasy qulap, 140 sharshy metr alańy janyp ketken. Órtten zardap shekken bes adam aýrýhananyń jansaqtaý bólimine jatqyzyldy.

Bir kúnnen keıin kúıik shalǵan er adam, odan soń ekinshi adam qaıtys boldy.

Oblystyq densaýlyq saqtaý basqarmasynyń baspasóz qyzmeti rastaǵan derekke qaraǵanda, aýrýhanada qaıtys bolǵandar — erli-zaıyptylar.

Dárigerlerdiń baǵalaýynsha, eresek adamdardyń denesiniń 90-95 paıyzyn kúıik shalǵan.
Atyraý oblystyq balalar aýrýhanasy dırektorynyń emdeý isi jónindegi orynbasary Erjan Esbolaevtyń aıtýynsha, eki bala jansaqtaý bólimine óte aýyr jaǵdaıda túsken.

«Eki balanyń denesinde 80-90 paıyz shamasynda kúıik bar. Balalar jasandy tynys alý qurylǵysyna qosyldy», - degen edi Erjan Esbolaev.

Aýrýhananyń jansaqtaý bólimindegi úsh aılyq sábı kóz jumdy.