Atyraýdaǵy Maqat aýdanynda 100-den astam apatty turǵyn úı bar

<p>Atyraý oblysynda apatty jaǵdaıda dep tanylǵan turǵyn úılerdiń sany kóp. Máselen, Maqat aýdanynda eskirgen, qulaý qaýpi tónýi múmkin 100-den astam úı esepke alynǵan, dep habarlaıdy <a href="Kazinform." target="_blank" rel="noopener">Kazinform.</a></p>

Atyraý oblysynyń ákimi Serik Shápkenov Maqat aýdanynyń turǵyndarymen kezdesýde atalǵan máselege baılanysty pikir bildirdi. Qazir bul máseleni júıeli túrde sheshý maqsatynda arnaıy joba qolǵa alynǵan.

«Maqat aýdanynda ǵasyrlyq tarıhy bar, alaıda apatty jaǵdaıda turǵan 100-den astam úı bar. Bul máseleni júıeli túrde sheshý kerek. Osyndaı turǵyn úılerde turatyn turǵyndardyń máselesin oń sheshýge arnalǵan arnaıy joba jasalyp jatyr. Sonyń nátıjesinde Inder aýdany men Atyraý qalasyndaǵy apatty úılerdiń turǵyndaryn jańa páterlerge kezeń-kezeńimen kóshirý josparlanyp otyr. Al, Maqat aýdanynda turǵyndardy kóshirý úshin satyp alatyn daıyn páter joq. Sol sebepten, jańa turǵyn úılerdi salý týraly sheshim qabyldadyq. Qazir Dossor kentinen «NSOS» kompanııasynyń áleýmettik-ınvestıtsııalyq jobalary aıasynda 60 páterlik bir turǵyn úıdiń qurylysyn bastaý úshin merdiger mekeme daıyndyq jumysyn júrgizip jatyr», - dedi Serik Shápkenov.

Ákimniń aıtýynsha, jańa turǵyn úıdiń qurylysyn 2024 jyldyń aıaǵyna deıin aıaqtaý josparlanǵan. Maqat aýdanyndaǵy apatty úılerdiń turǵyndaryn kóshirýge 80 páterlik turǵyn úı satyp alý úshin oblystyq bıýdjetten 1,6 mlrd teńge bólingen. 

Dossor kentiniń turǵyndaryn birneshe másele tolǵandyrady. Birinshiden, balalar úshin oıyn alańy qajet. Ekinshiden, temirjol vokzalyndaǵy perrondy kúrdeli jóndeý kerek. Úshinshiden, káriz sýyn tazartatyn nysannyń qajettigi týyndap tur. Tórtinshiden, kent kóshelerine jol salynǵanyn qalaıdy. 

Eske sala ketelik, budan buryn Dossor aýylynyń turǵyndary mınıstrge shaǵymyn jetkizgeni habarlanǵan edi.