Atyraýdaǵy Mahambet aýylyna qaýip tóndi
Atyraý oblysynyń jedel shtabynan málim etkendeı, soǵan baılanysty Mahambet aýdanynyń ortalyǵy – Mahambet pen Sarytoǵaı aýylynyń arasyndaǵy joldy jabýǵa týra kelgen.
«Jaıyq ózenimen ór sýynyń kóptep kelýi Mahambet aýylyna qaýip tóndirdi. Soǵan baılanysty Mahambet–Sarytoǵaı aýylyn jalǵaǵan tas jol jabylyp, sý arnasy baǵytyn burý úshin jyryldy. Mahambet aýdanynyń ákimdigi jol tósemin qalpyna keltirý úshin ınertti materıaldar daıyndady. Alaıda sýdyń kóp kólemde kelýi men aǵystyń qattylyǵynan bul jumysty júrgizý múmkin bolmaı tur», - dep habarlady oblystyq jedel shtab.
Sý deńgeıi tómendegennen keıin joldy qaıta qalpyna keltirý jumystary júrgiziletini josparlanyp otyr.
«Sý tasqynymen kúreste ýaqytsha qolaısyzdyqtar týyndaıdy. Biraq atalǵan jumystar turǵyndardyń qaýipsizdigi úshin óte mańyzdy. Sarytoǵaı eldi mekenin Mahambet aýylyna qatynaýshylar «Seıtek» sháıhanasy janyndaǵy aınalma jolmen júrýine bolady», - dep málim etti oblystyq jedel shtabtan.
Eske sala ketelik, budan buryn Atyraý-Oral trassasynyń Mahambet aýdanyndaǵy 44-shaqyrymy jyrylǵan bolatyn.
Keıin Atyraý-Oral trassasynyń 71-shaqyrymynda jol ústimen sý ótip jatqanyn habarlaǵan edik.