Atyraýdaǵy Qurylys aýylynyń turǵyndary 5 jyl buryn ishimdikten bas tartqan

<p>ATYRAÝ. KAZINFORM &ndash; Atyraý oblysynyń Qurylys aýylyndaǵy dúkenderde 5 jyldan beri alkogoldik ishimdik satylmaıdy. Bul &ndash; turǵyndardyń bastamasymen qolǵa alynǵan is.</p>

Qurylys aýyly Inder aýdanynan Atyraý qalasyna qatynaıtyn joldyń boıynda ornalasqan. Aýyldyń ýchaskelik ınspektory Isataı Jastalapulynyń aıtýynsha, munda 113 úı bar, turǵyndar sany — 700 adam.

— Aýyl turǵyndary sońǵy 5 jyldan beri alkogoldik ishimdikterden bas tartty. Sodan beri turǵyndardyń bastamasymen dúkenderde ishimdik satýǵa tyıym salyndy. Salamatty ómir saltyn ustaný baǵytyndaǵy bul qadamnyń nátıjesinde mas kúıde jasalatyn quqyq buzýshylyqtar men birde-bir qylmys tirkelgen joq, — deıdi Isataı Jastalapuly. 

Inspektordyń aıtýyna qaraǵanda, ishimdikten bas tartý aýyldaǵy qoǵamdyq tártipti saqtaýǵa aıtarlyqtaı yqpal etken. Aýylda qaýipsizdik deńgeıi artyp otyr.

— Eresekter de, jastar da alkogoldik ishimdik ónimderin tutynbaıdy. Sol sebepten, quqyq buzýshylyqtyń tirkelmeýine yqpal etedi. Bul — aýyl aqsaqaldarynyń tárbıesi men jastardyń uıymshyldyǵynyń jemisi. Tipti otbasylyq-turmystyq janjaldar da bolmaıdy. Aýyl turǵyndary negizinen mal sharýashylyǵymen aınalysady, — deıdi Isataı Jastalapuly.

Onyń pikirinshe, Qurylys aýylyndaǵy azyq-túlik dúkenderiniń ıeleri densaýlyqqa zııandy ónimderdi satýdan bas tartqanyna ókinbeıdi. Kerisinshe, aýyl turǵyndarynyń bastamasyna qoldaý bildirip otyr. 

— Qoǵamdyq tártipti saqtaý úshin quqyq qorǵaý organdary men qoǵamdyq uıymdardyń birlesken jumysy mańyzdy ról atqarady. Qandaı da bir másele týyndasa, onyń sebebin ýaqtyly anyqtaý úshin turǵyndarmen tyǵyz baılanys ornattym. Olar árdaıym kómektesedi», -dep málim etti ýchaskelik ınspektor.

Eske sala ketelik, budan buryn zábir kórgen 27 áıel Atyraýdaǵy daǵdarys ortalyǵyn panalaǵanyn habarlaǵan edik.