Atyraýdaǵy eki aýdanda Jaıyq jaǵalaýyna bóget salý tolyq aıaqtaldy

<p>ATYRAÝ. KAZINFORM &ndash; Atyraý oblysynyń eki aýdanynda Jaıyq ózeniniń jaǵalaýyna bóget salý tolyq aıaqtaldy.</p>

Atyraý oblysy jedel shtabynyń aqparatyna súıensek, Inder jáne Mahambet aýdanynda, Atyraý qalasynda sý aıdynynyń jaǵasyna bóget salý josparlanǵan. 

«Mahambet aýdanynda Jaıyq ózeniniń jaǵalaýyna 65,5 shaqyrym bóget salý kózdelgen edi. Qazir josparlanǵan bóget tolyǵymen turǵyzyldy. Bógettiń ortasha bıiktigi – 2,5 metr. Ózen jaǵasyndaǵy bógetti nyǵaıtýǵa shamamen topyraq toltyrylǵan 1 mln 093 myń 920 qap daıyndaldy. Jaǵalaýdy nyǵaıtý jumystaryna 1 myń 628 adam, 207 tehnıka tartyldy», -dep habarlady jedel shtabtan.

Shtabtyń málimetinshe, bóget salý, ony nyǵaıtý jumysy Inder aýdanynda da aıaqtalǵan. 

«Inder aýdanynda Jaıyq ózeniniń jaǵalaýyna 30 shaqyrym bóget salý josparlandy. Qazir bul jumys tolyǵymen aıaqtaldy. Jaǵalaýda nyǵaıtylǵan bógettiń ortasha bıiktigi – 4,5 metr. Bógetti nyǵaıtý úshin 518 myń 500 qapqa topyraq toltyryldy. Bul jumystardy atqarýǵa 988 adam, 132 tehnıka jumyldy», -dep málim etti jedel shtabtan. 

Eske sala ketelik, budan buryn Jaıyq ózeniniń deńgeıi Inderde — 707, Mahambet aýdanynda 770 santımetrge jetkenin habarlaǵan bolatynbyz.