Atyraýdaǵy bóget qurylysyna ózge óńirlerden jetkizilgen tehnıkalar tartylǵan
Oblystyq jedel shtabtyń málimetine súıensek, Atyraýǵa elimizdiń úsh oblysynan 195 tehnıka jumyldyrylǵan.
«Sý tasqynyna qarsy daıyndyq jumystaryn jedeldetý úshin ózge óńirlerden arnaıy tehnıkalar jetkizildi. Máselen, Túrkistan oblysynan 123, Jambyl óńirinen 55, al, kórshiles Mańǵystaýdan 17 arnaıy tehnıka bóget salý jumysyna tartyldy», - dep habarlady jedel shtabtan.
Jaıyq ózeniniń jaǵalaýynda ornalasqan eldi mekenniń biri – Almaly aýyldyq okrýgi. Buryn Mahambet aýdanyna qaraıtyn edi. Keıingi jyldary Atyraý qalasynyń ákimshilik bólinisine aýystyryldy. Almaly aýyldyq okrýginiń ákimi Gúlshat Aýhadıevanyń aıtýynsha, okrýg aýmaǵynda eki aýyl, 8 saıajaı bar. Almaly aýylynda 8,6, al, Bereke aýylynda 10,4 shaqyrymdyq bóget salý qolǵa alynǵan.
«Bóget turǵyzý aıaqtalǵannan keıin, ony bıiktetý jalǵasa beredi. Qazir Almalyda bógettiń deni salynyp, 200 metrdeı bóligi qaldy. Al, Berekede áli 5,6 shaqyrymyn salý qajet. Bul jumys aýyl turǵyndarynyń, sport, mádenıet, tótenshe jaǵdaılar salasy mamandary, men áskerılerdiń kúshimen atqarylyp jatyr. Topyraq tasý jumystaryna Túrkistan, Jambyl oblystarynan jetkizilgen kólikter tartyldy», - deıdi Gúlshat Aýhadıeva.
Bul okrýgte Jaıyq ózenine 350 metr bonn qoldanylǵan. Tótenshe jaǵdaılar salasy mamandarynyń túsindirýinshe, bonn – sý aıdynyna tógilgen munaı ónimderin jınaýǵa qoldanylatyn qurylǵy. Bul sý aǵysynyń aǵynyn baıaýlatýǵa yqpal etedi. Taǵy bir aıtatyn jaıt, qum toltyrylǵan qapshyqtardyń tózimdiligin arttyrý úshin kólik tegershikteri qoldanylyp jatyr. Almaly aýylynyń turǵyny Dúısenbaı Saıhanov sý tasqyny qaýpin úsh ret kórgen.
«Osy aýylda týyp-óstim. Alǵash ret sý tasqyny qaýpin 6 jasymda 1970 jyly kórdim. Keıin 1993 jyly Jaıyq ózeni arnasynan asyp, aýylymyz sý ortasynda qaldy. Mundaı qaýip 2005 jyly da tóndi. Sonyń bárinen aman ótip kelemiz. Kómekke elimizdiń bar óńiri jumylǵannan keıin sý tasqynynan aman ótetinimizge senemin», - deıdi Dúısenbaı Salıhanov.
Eske sala ketelik, Májilis depýtaty Ádil Jubanov halyqty sý tasqynynan qorǵaı almaýǵa óziniń de kinási bar ekenin aıtqan edi.