Atyraýdaǵy aýrýhanalardyń ashanasy sanıtarlyq talapqa saı emes

<p>Atyraýdaǵy aýrýhanalardyń ashanasy sanıtarlyq talapqa sáıkes kelmeıdi. Sybaılas jemqorlyqqa qarsy volonterler toby úsh aýrýhanadan birneshe kemshilikti anyqtady, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Sybaılas jemqorlyqqa qarsy is-qımyl agenttiginiń Atyraý oblystyq departamenti baspasóz qyzmetiniń aqparatyna qaraǵanda, jergilikti volonterleri «Ádildik joly RQB Atyraý fılıalymen birge aýrýhanalarǵa monıtorıng júrgizgen.

«Monıtorıng kezinde oblystyq balalar aýrýhanasy, psıhıkalyq densaýlyq ortalyǵy men onkologııalyq dıspanserdiń ashanalarynan birneshe kemshilik anyqtaldy. Atalǵan emdeý oryndarynyń ashanadarynda tamaq ónimderin paıdalanýdyń bastalǵan týraly tańbalaý joq. Daıyndalǵan tamaq ónimderiniń árbir partııasynan táýliktik synama alynbaǵan. Tamaq máziri densaýlyq saqtaý uıymy basshysymen bekitilmegen. Kókónisterdi saqtaý sharttary saqtalmaǵan. Munyń bári Densaýlyq saqtaý mınıstriniń 2022 jylǵy 17 aqpandaǵy № QR DSM-16 buıryǵymen bekitilgen qoǵamdyq tamaqtaný obektilerine qoıylatyn sanıtarlyq-epıdemıologııalyq talaptarǵa sáıkes kelmeıdi», - dep habarlady departamenttiń baspasóz qyzmeti.

Máselen, oblystyq psıhıkalyq densaýlyq ortalyǵynda 120-ǵa naýqas statsıonarlyq em alady. Ortalyqtyń ashanasynda jóndeý jumystary júrgizilip jatyr. Biraq, ashana kóshirilmeı, sol jerde tamaq daıyndalyp kelgen.

«Bul ortalyqtyń ashanasynda sıyr eti joq. Memlekettik satyp alý portalynyń derekterine sáıkes bıyl naýryz aıynda 3 mln 612 myń teńgege 1 500 keli et satyp alynǵan. Al, qazan aıynda 2 mln 268 myń teńgege taǵy 1 200 keli et satyp alý týraly shart jasalǵan», - dep málim etti departamenttiń baspasóz qyzmetinen.

Densaýlyq saqtaý mekemeleriniń qyzmetkerleri anyqtalǵan kemshilikterdi ǵımarattyń tozǵanymen túsindirgen. Al, basshylar ǵımaratty buzyp, qyzmetkerler men naýqastardy basqa orynǵa aýystyrý týraly ýádeden sharshaǵanyn aıtqan.