Atyraýdaǵy 4 jasar balanyń ólimi: Balabaqsha dırektory men tárbıeshiniń bas bostandyǵy shekteldi
Atyraý oblystyq kámeletke tolmaǵandar isteri jónindegi mamandandyrylǵan aýdanaralyq sotynda atalǵan oqıǵaǵa kánililerge qatysty qozǵalǵan qylmystyq is qaraldy. Aıyptalýshylar S. men D.-ǵa QR Qylmystyq kodekstiń 141-babynyń 2-bóligimen aıyp taǵylǵan.
«Sottalýshy S. 2023 jylǵy 21 mamyrda ruqsat qujattaryn alyp, óz atyna «D» jeke kásipkerligin tirkegen. Sodan keıin «Chebýrashka» kvazımemlekettik balabaqshasyn ashý úshin sol jylǵy 26 mamyrda Atyraý qalasynan eki qabatty ǵımaratty jalǵa alǵan.
Al, 2023 jylǵy 7 shildede balabaqsha dırektorynyń buıryǵymen D. top tárbıeshisi qyzmetine jumysqa alynǵan. Fýnktsıonaldyq mindetteri boıynsha sottalýshylar balalardyń ómiri men qaýipsizdigi úshin jaýapty bolǵan. 2023 jylǵy 1 qarashada 2020 jyly týǵan M. sottalýshy D.-nyń tobyna qabyldanǵan. Bıylǵy 10 shildede saǵat 10:45 shamasynda S. jáne D. ózderiniń fýnktsıonaldyq mindetterin tıisinshe oryndamaı, M.-ny qaraýsyz qaldyrǵan. Nátıjesinde M. káriz qudyǵyna qulap, qazaǵa ushyraǵan», - dep habarlady atalǵan sottan.
Osy iske baılanysty prokýror sottalýshylarǵa pedagogıkalyq laýazymdardy jáne kámeletke tolmaǵandarmen jumys isteýmen baılanysty laýazymdardy atqarý quqyǵynan 3, al, bas bostandyǵyn 3 jyl merzimge bas bostandyǵynan aıyrý jazasyn taǵaıyndaýdy usyndy. Kinálaryn moıyndaǵan sottalýshylar jáne olardyń qorǵaýshylary bas bostandyǵynan aıyrmaýdy surady. Sottalýshylardyń kinálary oqıǵa bolǵan jerdi qaraý hattamalarymen, fotokestelermen, kýálardyń aıǵaqtarymen, bettestirý hattamalarymen jáne basqa da is materıaldarymen dáleldengen.
Sot jazany jeńildetetin mán-jaı retinde mynadaı jaıttardy eskerdi. Máselen, S.-nyń kinásin moıyndaýyna, otbasylyq jáne densaýlyq jaǵdaıyna nazar aýdardy.
Al, D.-nyń kinásin moıyndaǵany, asyraýynda kámeletke tolmaǵan balalary bary eskerildi.
Sottalýshylar aıyp taǵylǵan bappen kináli dep tanyldy. Olarǵa pedagogıkalyq jáne kámeletke tolmaǵandarmen jumys isteýmen baılanysty laýazymdardy atqarý quqyǵynan 3 jylǵa, bas bostandyǵyn 2 jyl 6 aı merzimge aıyrý jazasy taǵaıyndaldy.
«QR Qylmystyq kodeksiniń 63-babyn qoldanylyp, jaza shartty túrde taǵaıyndaldy. Belgilengen jazanyń barlyq merzimine probatsııalyq baqylaý belgilendi», - dep málim etti sottan.
Sot úkimi zańdy kúshine engen joq.
Eske sala ketelik, budan buryn Atyraýda 4 jasar bala balabaqshanyń káriz qudyǵyna qulap, mert bolǵanyn jazǵan edik.
Keıin osy oqıǵaǵa baılanysty balabaqsha dırektory men tárbıeshi úıqamaqta otyrǵanyn habarladyq.