Atyraýda jolǵa tóselgen iri túıirshikti asfalt betony normaǵa sáıkes emes
Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, Atyraý qalasyndaǵy jol qurylysy, qaıta jańartý, ortasha jóndeý jumystaryna monıtorıng júrgizilgen.
«Atyraý qalasyndaǵy Jastar kóshesinen Erkinqala kentine deıingi uzyndyǵy 11,7 shaqyrym avtomobıl jolyn qaıta jańartý josparlanǵan. Oǵan bıýdjetten 16 mlrd teńge bólinipti. Jobalyq-smetalyq qujattama boıynsha jol jańartylyp, trotýar ornatylady. Buǵan qosa ınjenerlik kommýnıkatsııalar qaıta qurylady. Jalpy uzyndyǵy 54 shaqyrym elektr symyn, 322 tirekti, gaz, sý qubyrlaryn, baılanys, jylý jelilerin, kóshe jaryǵyn, baǵdarshamdardy montajdaý qarastyrylǵan. Bul joldy rekonstrýktsııalaýǵa «Atyraýınjstroı-AIS» JShS merdigerlikke tańdalǵan. Jumystyń oryndalý merzimi – 29 aı», - dep habarlady departamenttiń baspasóz qyzmeti.
Joldy jańartý jumysy sý tasqynyna baılanysty maýsym aıynda bastalǵan. Osy kezge deıin iri túıirshikti asfalt beton jabyny tóselgen 760 metr jol bóligi oqý jylynyń bastalýyna oraı jergilikti atqarýshy organnyń usynysymen ashylǵan.
«Sybaılas jemqorlyqqa qarsy eriktiler toby atalǵan joldy jańartý jumysyna monıtorıng júrgizdi. «Jol aktıvteriniń ulttyq sapa ortalyǵy» RMK Atyraý oblystyq fılıalynyń mamandary jolǵa tóselgen iri túıirshikti asfalt betonynyń joǵarǵy qabatynan kern synamasyn aldy. Kernniń qalyńdyǵy – 8 sm. Bul normatıvtik-tehnıkalyq jáne jobalaý-smetalyq qujattamaǵa sáıkes kelmeıdi», - dep málim etti departamenttiń baspasóz qyzmetinen.
Eriktiler toby anyqtalǵan kemshilikti joıý úshin tapsyrys berýshi men merdiger kompanııaǵa tıisti usynystar berdi.
Eske sala ketelik, budan buryn Atyraýda medıtsına mekememeleriniń dırektorlary JOO-da oqý úshin bıýdjettiń 10,5 mln teńgesin jumsaǵanyn jazǵan edik.