Atyraýda joǵary qabattan qulaǵan 12 jasar qyz aýrýhananyń jansaqtaý bólimine tústi

<p>ATYRAÝ. KAZINFORM &ndash; Atyraý qalasynda 12 jasar qyz turǵyn úıdiń joǵary qabattan qulady. Aýyr jaraqat alǵan jasóspirim oblystyq balalar aýrýhanasynyń jansaqtaý bólimine tústi.</p>

Oqys oqıǵanyń 9 qarashada bolǵany anyqtalyp otyr. Biraq, polıtsııa departamenti de, oblystyq densaýlyq saqtaý basqarmasy da búginge deıin aqparat taratqan joq. 

Al, búgin Atyraý oblystyq densaýlyq saqtaý basqarmasynyń baspasóz qyzmeti jasóspirimniń jansaqtaý bóliminide jatqanyn rastady. 

«Joǵarydan qulaǵan kezde aýyr jaraqat alǵan patsıent jasandy tynys alý apparatyna qosyldy. Naýqastyń jaǵdaıy áli de aýyr kúıde qalyp otyr», -dep habarlady basqarmanyń baspasóz qyzmeti. 

Al, Atyraý oblysy polıtsııa departamenti baspasóz qyzmetiniń aqparatyna súıensek, jasóspirim óz-ózine qol salmaq bolǵan. 

«Qazir jasóspirimniń joǵary qabattan qulaý deregine qatysty qylmystyq is qozǵaldy. Polıtsııa qyzmetkerleri keshendi tergeý amaldaryn bastady. Atalǵan oqıǵanyń jan-jaqty mán-jaılary tekserilip, anyqtalyp jatyr. Ózge aqparat tergeý múddesine sáıkes jarııalaýǵa jatpaıdy», -dep málim etti departamenttiń baspasóz qyzmeti.

Eske sala ketelik, buǵan deıin Atyraýda ústine qaqpa qulaǵan 9 jastaǵy qyzdyń jaǵdaıy aýyr ekenin jazǵan bolatynbyz.