Atyraýda jeke turǵyn úı órtenip, tútinge tunshyqqan 3 adam qutqaryldy

<p>Atyraý qalasynyń irgesinde ornalasqan Jumysker kentindegi jeke turǵyn úıdi órt shaldy. Órt sóndirýshiler jalyn sharpyǵan úıden tútinge tunshyqqan 3 adamdy alyp shyqty, dep habarlaıdy <a href="Kazinform." target="_blank" rel="noopener">Kazinform.</a></p>

Atyraý oblystyq tótenshe jaǵdaılar departamentiniń qoǵammen baılanys toby málim etkendeı, órt týraly habar 17 jeltoqsanda túngi saǵat 22:38-de berilgen.

«Órt sóndirýshiler oqıǵa ornyna jedel jetip, aýmaǵy 15h6 metr bolatyn turǵyn úıde turmystyq zattar men jıhazdardyń janyp jatqanyn anyqtady. Jalynnyń saldarynan 10 sharshy metrlik bólme otqa oranǵan. Turǵyn úıdiń ishinen tútinge ýlanǵan 3 turǵyn qutqaryldy. Zardap shekkender – 1973, 1978 jáne 1982 jylǵy turǵyndar. Qutqarýshylar ýlanǵan turǵyndarǵa tynys alý joldaryn qorǵaý apparatyn qosyp, alǵashqy medıtsınalyq kómek kórsetti. «Apattar medıtsınasy» ortalyǵynyń qyzmetkerleri qutqarylǵan zardap shekkenderdi Atyraý oblystyq aýrýhanasyna jetkizdi», - dep habarlady departamenttiń qoǵammen baılanys toby.

Jeke turǵyn úıdi sharpyǵan órt túngi saǵat 23:06-de tolyq sóndirildi. Órtti sóndirýge Atyraý oblystyq tótenshe jaǵdaılar departamentiniń №4 órt sóndirý bóliminen 11 qyzmetker men 3 arnaıy tehnıka, «Apattar medıtsınasy» ortalyǵynyń qyzmetkerleri tartylǵan.

Eske sala ketelik, budan buryn Atyraý oblysynda 7 balasy bar otbasy turatyn úı tolyǵymen órtenip ketkenin jazǵan edik.

Keıin Atyraýda munaı qaldyǵy bar temirjol tsısternasy jarylǵanyn habarlaǵan bolatynbyz.