Atyraýda jeke turǵyn úı órtenip, 81 jastaǵy qarııany kúıik shaldy
Turǵyn úı órti týraly búgin, 17 qarashada saǵat 15:10-da habar túsken. Órt oshaǵynda 81 jastaǵy ájeı qalyp qoıǵan.
– Atyraý qalasynyń Baıtaq yqsham aýdanynda ornalasqan 2 qabatty jeke turǵyn úı órtendi. Ony sol mańnan ótip bara jatqan órt sóndirý qyzmetiniń jedel kezekshisi, azamattyq qorǵaý maıory Nurlybek Qatapov baıqap qalǵan. Ol órt sharpyǵan úıge kirip, 81 jastaǵy qart ájeni kóterip, qaýipsiz jerge shyǵarǵan. Sodan soń jedel járdem brıgadasynyń qyzmetkerlerine tapsyrǵan. Órt saldarynan qart ájeniń 3 dárejeli kúıik alǵany anyqtaldy, - dep habarlady tótenshe jaǵdaılar departamentiniń qoǵammen baılanys toby.
Zardap shekken qarııa aýrýhananyń jansaqtaý bólimine jatqyzyldy.
Órtti sóndirýge Atyraý oblystyq tótenshe jaǵdaılar departamentiniń 20 qyzmetkeri men 4 tehnıkasy jumyldyryldy. Jalyn saǵat 15:34-te oqshaýlanyp, saǵat 16:29-da tolyqtaı sóndirildi. Órttiń tutaný sebebi anyqtalyp jatyr.
– Oblys turǵyndary men qonaqtarǵa turǵyn úıdegi órt qaýipsizdigi erejelerin qatań saqtaýdy eskertemiz. Óıtkeni, órt – adam ómirine qaýip tóndiretin, ókinishke uryndyratyn apattyń qataryna jatady, - dep málim etti qoǵammen baılanys toby.
Eske sala keteıik, buǵan deıin Atyraýda kópirden Jaıyqqa sekirýge oqtalǵan BQO turǵyny qutqarylǵanyn jazǵan bolatynbyz.