Atyraýda Jaıyqqa túsip ketken jeńil kóliktiń júrgizýshisi mert boldy

<p>ATYRAÝ. KAZINFORM &mdash; Atyraýda jeńil kólik Jaıyq ózenine túsip ketti. Kólik júrgizýshisi oqıǵa ornynda qaıtys boldy.</p>

Atyraý qalalyq ákimdiginiń baspasóz qyzmetinen málim etkendeı, oqıǵa búgin, 28 qańtarda bolǵan.

«Búgin jergilikti ýaqytpen 13:08 shamasynda Atyraý qalasynyń mańyndaǵy Kókarna aýylynyń tusynda Jaıyq ózeniniń muzy oıylyp, jeńil kólik túsip ketti. Kóliktegi jolaýshylardy qutqarý úshin jedel qutqarý jasaǵynan 4 qutqarýshy, 1 tehnıka jumyldyryldy. Oqıǵa ornynda 1992 jylǵy júrgizýshi kóz jumdy. Al, 2006 jylǵy jolaýshy oblystyq aýrýhanaǵa jetkizildi», -dep habarlady ákimdiktiń baspasóz qyzmeti.

Jergilikti ákimdik qala turǵyndary men qonaqtaryna muzdan ótý kezinde qaýipsizdikke mán berý qajettigin qulaqqaǵys etti.

«Muz ústimen júrgende qaýipsizdik erejelerin qatań saqtaý qajet. Ózen jaǵasynda qoıylǵan arnaıy belgini nazarǵa alǵan jón. Sý aıdynynyń ruqsat etilmegen tusynan ótpeý qajettigin eskerý kerek», -dep málim etti ákimdiktiń baspasóz qyzmetinen.

Eske sala ketelik, buǵan deıin polıtseıler ózenniń muzy oıylǵanda sýǵa túsip ketken eki adamdy qutqaryp qalǵanyn jazǵan bolatynbyz.