Atyraýda Jaıyq ózeniniń jaǵalaýynan qum toltyrylǵan qapshyqtar alynyp jatyr

<p>ATYRAÝ. KAZINFORM — Atyraý oblysynda Jaıyq ózeniniń jaǵalaýyna topyraq toltyrylǵan qapshyq qoıylǵan bolatyn. Búgin ózenniń munaıly shahar aýmaǵyndaǵy jaǵalaýynan sondaı qapshyqtar jınalyp jatyr.</p>

Atyraý qalalyq ákimdiginiń baspasóz hatshysy Ǵasyrbek Tólegenniń aıtýynsha, Jaıyq ózeniniń qaýip seıilgen aýmaqtarynan qum toltyrylǵan qapshyqtardy jınaýǵa uıǵarym jasalǵan. 

«Qazir Atyraý qalasynda Jaıyq ózenindegi sý deńgeıi tómendep keledi. Birneshe kúnnen beri sýdyń deńgeıi qaıta kóterilgen joq. Sol sebepten, Atyraý qalalyq ákimdigi tasqyn sý basý qaýpi seıilgen aýmaqtardan topyraq salynǵan qapshyqtardy jınaý jumysyn qolǵa aldy. Búgin Jaıyq ózeniniń Atyraý qalasyndaǵy ortalyq kópir, „Avangard“ shaǵyn aýdanyndaǵy jaǵalaýynan qum toltyrylǵan qapshyqtar jınaý bastaldy», -dedi Ǵasyrbek Tólegen. 

Onyń málimetine súıensek, Jaıyq ózeniniń Atyraý qalasy aýmaǵyndaǵy jaǵalaýynda 250,7 shaqyrym bóget bekitilgen. Qalalyq ákimdik tarapynan osy maqstaqa 4 mln 900 myń qapshyq taratylǵan. 

«Qapshyqtarǵa toltyrylǵan topyraq arnaıy karerlerden alynǵan edi. Endi ózen jaǵalaýynan jınalyp alynǵa qapshyqtaǵy sol karerlerge qaıta tógiledi. Bul jumysty Jaıyq ózeniniń jaǵalaýyn bekitý tapsyrylǵan kompanııalar men mekemeler atqarady», -dep málim etti Ǵasyrbek Tólegen. 

Búgin túsqaıta saǵat 16:00–de Jaıyq ózeniniń deńgeıi Atyraý qalasynda 591 santımetr boldy. 

Al, munaıly shahar mańyndaǵy Jańatalap aýylynda 423, al, Erkinqala eldi mekeniniń tusynda 381 santımetrdi kórsetti. 

Eske sala ketelik, budan buryn Atyraýdaǵy evakýatsııalyq pýnktterdegi turǵyndar túgeldeı úıine oralǵanyn habarlaǵan edik.