Atyraýda jaryqsyz qalǵan mektep oqýshylary qashyqtan oqyp jatyr

<p>ATYRAÝ. KAZINFORM &ndash; Atyraý qalasyndaǵy S.Zımanov atyndaǵy №37 orta mektepte 4 qańtardan beri elektr jaryǵy berilmeı tur. Osyǵan baılanysty oqýshylar 3 kúnnen beri qashyqtan oqyp jatyr.</p>

Oblystyq Bilim basqarmasynyń baspasóz qyzmetinen málim etkendeı, jaryqtyń óshkeni týraly «Atyraý Jaryq» AQ-nyń dıspetcherine habar berilgen.

– «Atyraý Jaryq» AQ mamandary jaryq jelisiniń úzilgen tusy mekteptiń teńgerimine kiretinin habarlady. Mektep ákimshiligi jaryq júıesin qalpyna keltirý maqsatynda «FLUX ENGINEERING» JShS-men bir kózden satyp alý shartyn jasaqtady. Atalǵan seriktestik elektr jelisiniń úzilgen tusyn anyqtap, jóndeý jumysyn júrgizýdi qolǵa aldy. Elektr jelisi mektep aýmaǵyna jaqyn ornalasqan turǵyn úı kesheniniń tusyndaǵy buryshtan úzilgen. Turǵyn úıge zaqym keltirmes úshin mekteppen aradaǵy asfalt joldyń astynan tesip, 80 metr elektr jelisin keri júrgizý jumysyn jalǵasyp jatyr, - dep habarlady basqarmanyń baspasóz qyzmeti.

Mekteptiń jylý qazandyǵy jumys istep tur. Generator arqyly jylý nasosqa elektr energııasy berilgen.

– Jaryq jelisi iske qosylǵan soń oqýshylar dástúrli formatta oqýǵa qosylady. Elektr energııasyn iske qosý úshin mekemeler tolyqqandy jumys júrgizip jatyr, - dep málim etti basqarmanyń baspasóz qyzmetinen.

Eske sala ketelik, budan buryn Atyraý oblysynyń jasóspirimderi 1 jylda 67 qylmys jasaǵanyn habarlaǵan edik.