Atyraýda jaramdylyq merzimi ótken taýar úshin 2 mln teńge suraǵan bloger sottaldy
Atyraý qalasyndaǵy №2 sotta qorqytyp alý, urlyq jasaý deregimen aıyptalǵan blogerge qatysty qylmystyq is qaraldy.
«Jergilikti bloger sýpermarkettiń sórelerinen jaramdylyq merzimi ótken taýarlardy tapqan. Keıin qyzmetkerge polıtsııa shaqyryp, aryz jazatynyn aıtyp, 2 mln teńge talap etken. Polıtsııa kelgen soń bloger jaramdylyq merzimi ótken ónimderdi satý jáne taýarlarda memlekettik tilde málimetterdiń bolmaýy týraly aryz jazǵan. Munymen toqtamaǵan bloger ótinishti qaıtaryp alý úshin 39 824 teńgege azyq-túlik alǵan. Al, birneshe kúnnen keıin bloger sot protsesine qatysqan áriptesin qoldaý úshin Atyraý qalasynyń №2 sotyna kelken. Munda prokýrorlarǵa arnalǵan bólmege kirip, shkafta turǵan prokýrorlardyń biriniń kıiminiń qaltasynan 20 myń teńgeni jasyryn urlaǵan», -dep habarlady sottyń baspasóz qyzmeti.
Sot barysynda bloger kinásin moıyndamaǵan. Bloger ózin aqtaýdy suraǵan.
«Sottalýshynyń kinási jábirlenýshilerdiń, kýálardyń aıǵaqtarymen, tergeý áreketteriniń beınejazbalarymen dáleldendi. Sot úkimimen bloger QR Qylmystyq kodeksiniń 194-babynyń 2-bóliginiń 3-tarmaǵy, 188-babynyń 3-bóliginiń 3-tarmaǵy boıynsha kináli dep tanyldy. Oǵan QR Qylmystyq kodeksiniń 58-babynyń negizinde 3 jyl 1 aı merzimge bas bostandyǵynan aıyrý túrindegi jaza taǵaıyndaldy», -dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, budan buryn Atyraýda kásipkerden 2 mln teńge bopsalaǵan bloger ustalǵanyn jazǵan edik.