Atyraýda zańsyz júrgen sheteldikterge elden ketý talaby qoıyldy

<p>ATYRAÝ. KAZINFORM &mdash; Atyraýda zańsyz júrgen Aýǵanstan men Bangladesh Respýblıkasynyń azamattary ustaldy. Sot sheshimimen Qazaqstannyń kóshi-qon zańdylyǵyn buzǵan sheteldikterge elden ketý talaby qoıyldy.&nbsp;</p>

Atyraý oblystyq polıtsııa departamentiniń baspasóz qyzmetinen málim etkendeı, kóshi-qon qyzmeti basqarmasynyń qyzmetkerleri UQK Shekara qyzmetimen birlesken jedel is-shara ótkizip, zańsyz júrgen Aýǵanstan jáne Bangladesh Respýblıkasynyń 6 azamatyn anyqtady.

«Shetel azamattary 2023 jyldyń qazan-jeltoqsan aılary aralyǵynda Qazaqstan aýmaǵyna saýda-sattyq, marketıng júrgizý maqsatymen Almaty jáne Qostanaı qalalaryna baryp kelgen. Alaıda, vızalarynyń merzimi ótip, zańnamany oryndamaǵan sheteldikter el aýmaǵynan shyqpaı qalǵan. Osyǵan baılanysty sot sheshimimen 4 sheteldikke aıyppul salyndy. Al, 2 sheteldiktiń vızasy jaramsyz dep tanyldy. Kóshi-qon zańnamasynyń talaptaryn buzǵan barlyq sheteldikke Qazaqstan Respýblıkasynyń aýmaǵynan ketýge shyǵý vızalary berildi. Endi olar Qazaqstan shekarasynan 15 kúnniń ishinde shyǵyp ketýi kerek», - dep habarlady departamenttiń baspasóz qyzmeti.

Eske sala ketelik, budan buryn bıyl Atyraý oblysyna jumys isteýge 4 765 sheteldik keletinin jazǵan bolatynbyz.