Atyraýda túzeý mekemesi bastyǵynyń mindetin atqarýshyǵa 30 mln teńge aıyppul salyndy
Atyraý qalalyq №2 sotynyń aqparatyna súıensek, sottalýshyǵa para alǵany úshin QR Qylmystyq kodeksiniń 366-babynyń 2-bóligimen qylmystyq is qozǵalǵan.
Sot materıalyndaǵy derekke qaraǵanda, Atyraý oblysy boıynsha qylmystyq-atqarý júıesi departamentine qaraıtyn №75 mekeme bastyǵynyń mindetin atqarýshy sottalǵan er adamnyń aǵasynan 1 mln teńge kóleminde para alǵan. Sóıtip, sottalýshyny sharýshylyq jumystaryna qaldyrylǵandardyń sanatyna aýystyryp, tergeý ızolıatorynda qaldyrmaq bolǵan.
«️Qylmystyq is sotqa deıingi jedeldetilgen tergep-tekserý tártibimen kelip tústi. Sottalýshy óziniń kinásin tolyqtaı moıyndap, jınaqtalǵan dálelderge daý keltirmedi. Sot otyrysynda dálelderdi zertteýdi talap etpegendikten sot talqylaýy qysqartylǵan tártippen qaraldy», - dep habarlady sottyń baspasóz qyzmetinen.
Prokýror sottalýshyǵa memlekettik qyzmette jáne memlekettik uıymdarda qyzmet atqarý quqyǵynan ómir boıyna, bas bostandyǵynan 3 jyl 6 aı merzimge aıyrý jazasyn taǵaıyndaýdy, «ádilet podpolkovnıgi» arnaıy sheninen aıyrýdy surady. Sottalýshy kinásin tolyqtaı moıyndap, jeńil jaza túrin taǵaıyndaýdy surady.
Sot sottalýshynyń asyraýynda kámeletke tolmaǵan balalarynyń baryn, kinásin moıyndaǵanyn, ókingenin eskerip, muny jaza men qylmystyq jaýaptylyqty jeńildetetin mán-jaı retinde tanydy. Aýyrlatatyn mán-jaılar anyqtalmaǵan.
«Sottalýshy taǵylǵan aıyp boıynsha kináli dep tanyldy. Oǵan memlekettik qyzmette jáne memlekettik uıymdarda laýazymdardy atqarý quqyǵynan ómir boıyna aıyra otyryp, 30 mln teńge (paranyń 30 eselengen somasy) mólsherinde aıyppul salý jazasy taǵaıyndaldy. Ol «ádilet podpolkovnıgi» arnaıy sheninen aıyryldy», -dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, budan buryn Atyraýda birneshe ret para alǵan ınspektsııa basshysy 7,5 jylǵa sottalǵanyn jazǵan edik.