Atyraýda tutyný kooperatıvine qatysty qozǵalǵan qylmystyq is sotqa jetti

<p>Atyraý oblysynda jyl basynan beri qarjy pıramıdasyn qurýǵa baılanysty 3 derek anyqtalǵan. Qazir bir kompanııaǵa qatysty qylmystyq is sotta qaralyp jatyr, habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.&nbsp;</p>

Qarjylyq monıtorıng agenttigi Atyraý oblysy boıynsha Ekonomıkalyq tergep-tekserý departamentiniń shtab bastyǵy Bekbolat Ánesovtiń málim etkenindeı, tutyný kooperatıvine 296 salymshy tartylǵany anyqtalǵan.

«Departament qyzmetkerleri turǵyndardy aldap-arbaýdyń aldyn alý úshin monıtorıng júrgizip keledi. Monıtorıngtiń nátıjesinde Atyraýda qarjy pıramıdasyn qurǵan tulǵalardyń isi áshkerelendi. Olar «QazHome» tutyný kooperatıvin jeke jáne zańdy tulǵalardyń aqshasyn nemese ózge de múlkin tartýdan kiris alý, keıbir qatysýshylardyń aktıvterin qaıta bólý, basqalardyń jarnalary esebinen baıytý qyzmetin uıymdastyrǵan. Osy derekti tergeý kezinde kooperatıv qyzmetine 296 salymshy tartylǵany anyqtaldy. Salymshylardyń tek 35-i ǵana shaǵymdanyp, aryz jazdy. Aryz boıynsha zalal somasy 49 mln teńgeden asady. Qazir atalǵan qylmystyq is sotta qaralyp jatyr», -dep habarlady Bekbolat Ánesov.

Onyń aıtýynsha, ekonomıkalyq qylmys túrleri, ásirese, qarjy pıramıdalary orasan mol zalalǵa uryndyrady. Máselen, byltyr qarjy pıramıdalarynan 500 adam zardap shekken.

«Oblys turǵyndary men qonaqtarynan týysqandary, ne jaqyn tanystary qarjy pıramıdasynyń áreketinen zardap shekse, Atyraý oblysy boıynsha Ekonomıkalyq tergep-tekserý departamentine habarlaý suralady. Azamattardy qyraǵy bolýǵa jáne aqshalaı jınaǵyn kúmándi qarjy ınstıtýttaryna salmaýǵa shaqyramyz», - dep málim etti Bekbolat Ánesov.

Eske sala ketelik, budan buryn Atyraýda qarjy pıramıdasyn qurý kúdigimen eki kompanııaǵa qatysty tergeý júrip jatqanyn jazǵan edik.