Atyraýda tasqyn kezinde avtosalonda júrgen sheneýniktiń basy daýǵa qaldy

<p>ATYRAÝ. KAZINFORM &mdash; Áleýmettik jelilerde Atyraý ákimdiginiń qyzmetkeri A. Ibragımovtyń jumys ýaqytynda TOYOTA avtosalonynda júrgen vıdeosy tarady. Vıdeonyń avtory bloger Rústem Baıazıev ony qala ákiminiń orynbasary dep tanystyrady. Ony kórgen jeli qoldanýshylary halyq sýmen arpalysyp jatqanda nege sheneýnikter kólik qarap júr dep ashýlandy. Jaǵdaıdy Atyraý oblysy ákiminiń baspasóz hatshysy Rýslan Jumaǵazıev túsindirdi.&nbsp;</p>

Onyń aıtýynsha, qyzmetker salonǵa jumys babymen barǵan. 

«Tabıǵı jáne tehnogendik sıpattaǵy tótenshe jaǵdaıǵa baılanysty júrgizilip jatqan jumys barysynda A.Ibragımov qala ákimi apparaty is basqarmasynyń teńgerimindegi TOYOTA avtokólikterin jóndeýge qoıý úshin qosalqy bólshekterdi qarap júrgen. Sol kezde ony bloger R.Baıazıev qýyp jetip, beınejazbaǵa túsirgen. Atalǵan vıdeodaǵy qyzmetker aqparatta aıtylǵandaı ákim orynbasary emes. A. Ibragımov 2024 jyldyń qańtarynan bastap Atyraý qalalyq turǵyn úı kommýnaldyq sharýashylyǵy jáne turǵyn úı ınspektsııasy bóliminiń abattandyrý jáne kógaldandyrý sektorynyń bas mamany laýazymynda jumys istep keledi» deıdi Rýslan Jumaǵazıev. 

Ákimniń baspasóz hatshysynyń sózine sensek, atalǵan bloger aqparatty burmalaý arqyly provokatsııa jasaǵan.

«Tabıǵı sıpattaǵy tótenshe jaǵdaı kezinde ózderin qoǵam belsendisi sanap júrgen azamattardyń memlekettik qyzmetshilerdi ártúrli arandatý arqyly aqparatty óz paıdasyna burmalap berý áreketin qup kórmeıtinimizdi jetkizemiz» dep atap ótti ol. 

Munyń aldynda qala ákimdigi de qyzmetkerdiń ákimdik balansyndaǵy TOYOTA markaly kólikterin jóndeýden ótkizý maqsatynda resmı dılerden qosalqy bólshekterdiń baǵasyn bilip, tapsyrys berýge barǵanyn habarlaǵan.