Atyraýda sý tasqynynan búlingen eki jol áli jóndelmeı tur
Sý tasqynynan 25,4 shaqyrym jol, 6 kópir búlingen
Atyraý oblystyq jolaýshylar kóligi jáne avtomobıl joldary basqarmasynyń bas mamany Nuraly Ábıshannyń málimetine súıensek, kóktemde Oıyl, Jem jáne Jaıyq ózenderi tasyǵan kezde Qyzylqoǵa, Jylyoı, Inder, Mahambet aýdandary men Atyraý qalasynda jol men kópirlerge zaqym kelgen.
— Sý tasqyny kezinde búlingen joldyń uzyndyǵy 25,4 shaqyrymdy quraıdy. Jol boıyndaǵy 6 kópir jaramsyz bolyp qaldy. Jyl sońyna deıin jol men kópirlerdi qalpyna keltirý jumystary aıaqtalady, — deıdi Nuraly Ábıshan.
Onyń deregine qaraǵanda, jóndeý jumystaryn júrgizý kezinde sý basqan ýchaskelerge qosymsha sý ótkizgish qubyrlar salynyp jatyr.
— Jóndeý jumystaryna bastalǵanymen Atyraý-Inder avtomobıl jolynda kólik qozǵalysyna shekteý joq. Tasjoldyń júrýge jaramsyz aýmaǵyna aınalma jol salyndy. Qazir atalǵan trassadaǵy 44 shaqyrym joldyń jıegi men 3 shaqyrym jol jabyndysy qalypqa keltirilip jatyr. Atalǵan jumystardy «Atyraý joldary», «Qazaqdorstroı» JShS júrgizýdi qolǵa aldy, — dep habarlady Nuraly Ábıshan.
Merdiger jóndeýdi áli bastaǵan joq
Alaıda, Atyraý-Oral jáne Dossor-Qulsary baǵytyndaǵy joldyń búlingen bóligin jóndeý áli bastalǵan joq. Bul derekti «QazAvtoJol» UK» AQ Atyraý oblystyq fılılalynyń dırektory Murat Myqtabaev rastady.
Onyń aıtýynsha, respýblıkalyq mańyz berilgen atalǵan joldardaǵy búlingen bólikti jóndeý aldaǵy jylǵa josparlanǵan.
— Bıylǵy 4 sáýirde Jem ózeniniń arnasynan asqan sý respýblıkalyq mańyzy bar A-33 «Dossor-Qulsary-Aqtaý» avtomobıl jolyn, Qulsary qalasynyń aýmaǵyn basqan edi. Atap aıtqanda, atalǵan joldyń 101-103 jáne 119-122-shaqyrym aralyǵyn sý basty. Tasyǵan sý 25 sáýirge deıin jalǵasty. Osyǵan baılanysty 4 sáýirde jol qozǵalysy qaýipsizdigin qamtamasyz etý maqsatynda barlyq avtokólik túrine qozǵalys shekteldi, — deıdi Murat Myqtybaev.
Onyń deregine qaraǵanda, 12-14 sáýirde 101-103-shaqyrym aralyǵynda tasqyn sý buzǵan jol bóligin ýaqytsha qalypqa keltirgen. Bul jumysty «KAJservıs» JShS-niń Atyraý oblystyq fılıalynyń qyzmetkerleri atqarǵan.
— Sol kezde búlingen jol bóligine sý ótkizýge arnalǵan 12 qubyr salyndy. Onyń ústine ınertti materıaldar tóseldi, — deıdi Murat Myqtybaev.
Sodan beri «Dossor-Qulsary» baǵytymen júretin kólikter ýaqytsha qalpyna keltirilgen jol bóliginiń ústimen ótip júr. Júrgizýshiler joldyń búlingen tusyna kelgende, kólik jyldamdyǵyn azaıtady.
— Qazir Atyraý oblysynyń aýmaǵymen ótetin respýblıkalyq mańyzy bar «Dossor-Qulsary-Beıneý-Saı-Ótes-Shetpe-Jetybaı-Aqtaý porty» (A-33) avtomobıl jolynyń 3-36, 36-69-shaqyrymy aralyǵynda ortasha jóndeý jumysy júrip jatyr. Ony atqaratyn merdiger — «BirlikJolStroı» JShS. Merdigermen kelisimshart 2024 jyldyń 13 maýsymynda jasaldy. Osy kezge deıin atalǵan joldyń 3-36-shaqyrymy aralyǵynda 1 320 sharshy metr shuńqyr jamaldy. Jol jabynynyń 54 320 sharshy metri alynyp, 14 800 qýma metr jaryqqa shaıyr quıyldy. Joldyń 3 136 sharshy metri asfaltobetonmen tegistelip, 7 200 sharshy metr jıegi qıyrshyq taspen nyǵaıtyldy, — deıdi Murat Myqtybaev.
Al, 36-69-shaqyrym aralyǵynda 1 600 sharshy metr shuńqyr jamalyp, 76 431 sharshy metrdiń jol jabyny alynǵan. Sondaı-aq, 10 152 qýma metr jaryq shaıyrmen bitelgen. Joldyń 6 600 sharshy metri asfaltobetonmen jabylyp, 4 500 sharshy metr jıegine qıyrshyq tas tóselgen.
— Atalǵan joldyń 101-102,2, 119,6-122,1, 171,6-210 shaqyrymy aralyǵyn ortasha jóndeýden ótkizý úshin 2024 jyldyń 16 qyrkúıeginde kelisimshart jasaldy. Bul jumysty atqaratyn merdiger — «SıneMıdasStroı» JShS. Kelisimshartqa sáıkes jumys áli bastalǵan joq. Qujat boıynsha jumys eki jyldyń ishinde jasalýy tıis. Qazir merdiger joldyń 101-shaqyrymy bóligine salynatyn temirbeton sý ótkizgish turbasyna jáne basqa ınertti materıaldarǵa tapsyrys berip qoıdy. Al, «Atyraý-Oral» avtomobıl jolynyń 44-shaqyrymy sý ótkizý úshin jyrylyp, turbalar salynǵan edi. Keıin ýaqytsha qalpyna keltirildi. Joldyń bul bóliginde de ortasha jóndeý jumysy 2025 jyly jasalady, — deıdi Murat Myqtybaev.
Eske sala ketelik, budan buryn Atyraýdan Reseı shekarasyna deıingi jol qurylysy qalaı júrip jatqanyn jazǵan edik.