Atyraýda sý tasqynyna qarsy jumysqa ońtústik óńirlerden 250-den astam kólik tartyldy
Atyraý oblysynyń jedel shtabynan málim etkendeı, Jambyl oblysynan 58, Shymkent qalasynan 200 tehnıka jetkizilgen.
Jambyl oblystyq jolaýshylar kóligi jáne avtomobıl joldary basqarmasynyń bólim basshysy Erbolat Seıitbekovtiń aıtýynsha, 15 sáýirden beri arnaıy tehnıkalar 10 eldi mekende jaǵalaýdy bekitý jumysyna tartylǵan.
«Halqymyzdyń qanynda qınalǵan jandarǵa qamqorlyq tanytý, kómek berý sekildi qasıetter bar. Osy turǵydan aıtqanda, biz munaıly óńirdegi eldi mekenderdi sý tasqynynan qorǵaýǵa kómek berý úshin keldik. Biz – bir eldiń azamatymyz. Biz qıyndyqtyń bárin birlese eńseremiz. Óıtkeni, bizdiń kúshimiz – birlikte. Eldiń birligi osyndaı sátte kórinedi», -deıdi Erbolat Seıitbekov.
Al, Shymkent qalasynan jetkizilgen kólikterdiń arasynda 140 júk kótergish, 40 júk tıegish, 5 Gazel, 2 ekskavator, 2 býldozer, 10 sý tasıtyn qurylǵy, 2 «Belarýs 80» traktory bar.
«Qazir ońtústik óńirlerden kómekke jetkizilgen arnaıy tehnıkalar Atyraý qalasynda, onyń mańyndaǵy Damby, Qyzylbalyq, Erkinqala eldi mekenderinde, Isataı, Mahambet, Inderbor aýdandarynda bóget salý jumystaryna paıdalanyldy. Al, 6 tehnıka Jylyoı aýdanynyń ortalyǵy – Qulsary qalasyndaǵy tasqyn sýdyń zardabyn qalpyna keltirý, tazalaý jumystaryna jiberildi», -dep habarlady oblystyq jedel shtabtan.
Eske sala ketelik, budan buryn Atyraý oblysynda sý tasqynyna daıyndyq qalaı júrgizilgenin habarlaǵan bolatynbyz.