Atyraýda sý basqan aýmaqtardaǵy bógetterde qaýipsizdik kúsheıtildi

<p>ASTANA. KAZINFORM - Atyraýda tasqyn aýmaqtarynda jel kóterilýine baılanysty bógetterde qaýipsizdik kúsheıtildi, dep habarlaıdy oblystyq TJ jónindegi jedel shtaby.</p>

"Qazgıdromet" RMK Atyraý oblysy boıynsha fılıalynyń málimetinshe, Mahambet, Inder aýdandarynda batystan, soltústik-batystan qatty jel soǵýda. Jeldiń kóterilý jyldamdyǵy sekýndyna 6-11 metrge deıin jetedi dep kútilýde.

Sondaı aq, Atyraý qalasynda jel kúsheıýde. Jeldiń soǵýy sekýndyna 7-12 m jyldamdyqqa deıin jetedi dep kútilýde.

Aýa raıynyń qolaısyzdyǵyna baılanysty, Mahambet, Inder aýdandary, Atyraý qalasynda bóget boıyndaǵy belgilengen ýchaskelerde kezekshiler kúsheıtilgen rejımde jumys istep jatyr.

Eske sala ketelik, saǵat 12:00-degi jaǵdaı boıynsha, Jaıyq ózenindegi sý deńgeıi Inder aýdanynda - 896 sm (shekti deńgeıi - 845 sm), Mahambet aýdanynda 993 sm (shekti deńgeıi - 850 sm), Atyraý qalasynda 592 sm ( shekti deńgeıi - 550 sm) qurady.