Atyraýda shatyry tesik mekteptiń ǵımaraty buzylatyn boldy

<p>Atyraý qalasynda shatyry tesik mekteptiń ǵımaratyn tolyǵymen buzý máselesi qarastyrylyp jatyr, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Atyraý oblysy ákiminiń orynbasary Jasulan Bısembıevtiń aıtýynsha, tóbesinen sý aqqan №30 mektep-gımnazııasynyń ǵımaratyn jóndeý máselesi áli tolyq sheshimin tappaǵan.

«Bilim ordasyndaǵy shatyrdyń beti tegis, bıtým mastıkasy quıylǵan. Kúnniń ystyǵy men jeldiń, basqa da syrtqy faktorlardyń saldarynan shatyrdan sý aǵady. Shatyrdyń beton mastıkasyn alyp tastaıyq desek, bul múmkin emes. Óıtkeni 2-3 jyldan soń taǵy sý aǵýy múmkin. Túbegeıli qaıta jabýdy qolǵa alaıyq desek, ǵımarattyń 60 protsentine jaryq tóbeden túsedi. Synyptar elektr jaryǵynsyz qalady. Memlekettik standarttarǵa saı kelmeıdi. Endi mekteptiń ǵımaratyn tolyq buzýdy qarastyryp otyrmyz. Onyń ornyna jańa oqý orny salynady», – deıdi Jasulan Bısembıev.

Onyń aıtýynsha, bul bilim ordasy 2002 jyly paıdalanýǵa berilgen. Mektepte 54 kabınet bar. Biraq, 2007 jyly shatyrdan sý óte bastaǵan. Bıylǵy aqpanda aqqan sýdan 40 kabınet jaramsyz bolyp qaldy. Sol sebepten, balalar basqa oqý ornynda oqyp jatyr.

«Mektep buzylǵan soń, onyń ornyna jańa bilim ordasy salynady. Bilim ordasy jabylmaıdy. Pedagogıkalyq quram saqtalyp qalady. Biz jyldar boıy qordalanǵan máseleni sheshýge tyrysyp otyrmyz. Sol sebepten, shydaı turý kerek», – dep málim etti Jasulan Bısembıev.

Eske salaıyq, Atyraýda tóbesi tesik mekteptiń bastaýysh synyp oqýshylary onlaın oqýǵa jiberilgenin jazǵan bolatynbyz.

Keıin shatyrynan sý aqqan mekteptiń oqýshylary ózge bilim ordasyna aýystyrylǵanyn habarladyq.