Atyraýda saýda ortalyǵyndaǵy órt elektr jelisiniń qysqa tuıyqtalýynan tutanǵan

<p>ATYRAÝ. KAZINFORM &ndash; Atyraýda saýda ortalyǵyndaǵy órttiń tutanýyna elektr jelisiniń qysqa tuıyqtalýy sebep bolǵan. Tútinniń ıisine ýlanǵan júkti áıel dárigerler kómegine júgingen.</p>

Atyraý oblystyq tótenshe jaǵdaılar departamenti qoǵammen baılanys tobynyń málimetine súıensek, «Baızar» saýda-oıyn saýyq ortalyǵynda aldymen balalarǵa arnalǵan kıim dúkeniniń qoımasy jana bastaǵan. 

«Saýda ortalyǵyndaǵy órt jóninde 27 qazanda keshki saǵat 18:37 shamasynda shaqyrtý tústi. Órt sóndirýshiler Atyraý qalasyndaǵy B.Qulmanov kóshesinde ornalasqan saýda oıyn-saýyq keshenine jedel jetti. Oqıǵa ornynda shtab quryldy. Aldymen órtengen nysannan 80 adamdy, onyń ishinde 45 balany qaýipsiz aýmaqqa evakýatsııalady. Tútin ıisine ýlanǵan 1992 jylǵy júkti áıel densaýlyǵyna baılanysty shaǵym aıtty. Oǵan apattyq medıtsına ortalyǵynyń dárigerleri kómek kórsetti», -dep habarlady departamenttiń qoǵammen baılanys toby. 

Órtti sóndirýge jergilikti tótenshe jaǵdaılar lepartamentiniń 92 qyzmetkeri jumyldy. Jalyndy sóndirýge arnalǵan 12 tehnıka tartyldy. Departamenttiń psıholog mamandary evakýatsııalanǵan adamdarǵa jáne kásipkerlerge psıhologııalyq kómek kórsetti.

Oqıǵa ornynda jedel járdem stansasynyń 2 brıgadasy, Apattyq medıtsına ortalyǵynyń 4 qyzmetkeri, polıtsııa departamentiniń 50 qyzmetkeri kómekke keldi. Qosymsha 23 tehnıka men jedel áreket etý mekemeleri jumys istedi. 

«Saýda ortalyǵyndaǵy órt saǵat 21:58-de oqshaýlanyp, saǵat 22:50-de tolyqtaı joıyldy. 

Jalyn sharpyǵan aýmaqtyń jalpy kólemi shamamen 1000 sharshy metrdi qurady. Órttiń shyǵýyna aldyn ala boljamǵa sáıkes elektr jelisiniń qysqa tuıyqtalýy sebep bolǵan», -dep málim etti departamenttiń qoǵammen baılanys tobynan. 

Órtten eshkim zardap shekken joq. Soǵan qaramastan, «Baızar» oıyn-saýyq ortalyǵyndaǵy órt oqıǵasyna baılanysty tótenshe jaǵdaılar departamentiniń daǵdarys ortalyǵynda qaýyrt jeli iske qosyldy. Turǵyndarǵa 45-14-75 nómeri arqyly aqparattyq qoldaý jáne shuǵyl psıhologııalyq kómek kórsetý qolǵa alyndy. 

Eske sala ketelik, buǵan deıin Atyraýda saýda ortalyǵy órtenip, 80 adam qaýipsiz aýmaqqa evakýatsııalanǵanyn jazǵan edik. 

Keıin Atyraýda saýda-oıyn saýyq ortalyǵyndaǵy órt oqshaýlanǵanyn habarladyq. 

Sondaı-aq, Atyraýdaǵy saýda-oıyn saýyq ortalyǵyn sharpyǵan órt tolyq sóndirilgenin jazǵan bolatynbyz.