Atyraýda «Sarayshyq upgrade–2024» halyqaralyq jastar forýmy ótip jatyr
Atyraý oblysynyń ákimi Serik Shápkenovtiń aıtýynsha, mundaı forýmdy jyl saıyn ótkizý qajet. Óıtkeni, eki kúnge sozylatyn forýmda jasandy ıntellekt, marketıng, mýzyka jáne kınematografııa, teatr, horeografııa baǵyttary talqyǵa túsedi. Demek, bul – jastarǵa beriletin zor múmkindik.
Máselen, byltyr forýmǵa «Mýzyka» baǵyty boıynsha qatysqandardyń qatarynda atyraýlyq «KEZEN» toby da bar. Bul top Astanada ótken «YouFest» festıvaline shaqyrylyp, alǵash ret estrada juldyzdarymen birge óner kórsetti.
Al H.Dosmuhamedov atyndaǵy Atyraý ýnıversıtetiniń stýdenti Orynbasar Narıman «Kınematografııa» baǵytynda tájirıbe jınaǵan. Ol otandyq fılmderge qozǵalyp turatyn afısha jasaǵan. Onyń jobasy elimizdiń ár óńirinde kórsetildi.
Oblys ákimi baspasóz qyzmetiniń málimetinshe, «Sarayshyq upgrade–2023» halyqaralyq jastar forýmyna qatysýǵa 1000-nan astam jas nıet bildirgen. Forýmǵa irikteýden ótken 300-den astam jas qatysyp otyr. Olar Reseı, Qyrǵyzstan, Ózbekstan, Ázerbaıjan elderi jáne elimizdiń barlyq qalasynan kelgen.
«Qazir álemde kún saıyn derlik ózgeris bolyp jatyr. Zamanaýı máseleler de týyndaıdy. Osyndaı sátte jigerli ári shyǵarmashyl jastardyń orny da, úni de erekshe mańyzǵa ıe bolady. Jas býynnyń oı-pikiri men usynystary tek bizdiń óńirdiń ǵana emes, elimizdiń damýyna jańa serpin beredi. Sol sebepten, osy forým aıasynda almasqan tájirıbeler men ıdeıalar jarqyn bolashaqqa jol ashady dep úmittenemin. Birlesken jumystardyń nátıjesinde qoǵamnyń demokratııalyq úrdispen damýyna, ekonomıka men rýhanııattyń alǵa baýsyna mańyzdy jobalar iske asyrylatynyna senemin», -dedi Serik Shápkenov.
Eske sala ketelik, buǵan deıin Paralımpıada oıyndarynda qola júlde alǵan atyraýlyq paradzıýdoshylarǵa kólik berilgenin jazǵan bolatynbyz.