Atyraýda polıtseıdiń eskertýin elemegen júrgizýshiniń kesirinen jolaýshy mert boldy

<p>Atyraýda polıtseıdiń eskertýin elemegen júrgizýshiniń kóligi qarsy baǵyttaǵy júk kóligimen soqtyǵysqan. Jol apatynan kóliktegi 43 jastaǵy jolaýshy mert boldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Atyraý oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy búgin, 26 qazanda bolǵan.

— Jergilikti ýaqytpen saǵat 12:40 shamasynda respýblıkalyq mańyzy bar Aqtóbe-Atyraý-Astrahan tasjolynyń 794-shaqyrymy tusynda jol-kólik oqıǵasy tirkeldi. 1979 jylǵy er adam júrgizip kelet jatqan «ÝAZ» avtokóligi qarsy baǵyttaǵy «DAF XF» avtokóligimen soqtyǵysty. Jol-kólik oqıǵasynyń saldarynan «ÝAZ» avtokóliginde otyrǵan 1980 jylǵy jolaýshysy qaza tapty, — dep habarlady departamenttiń baspasóz qyzmeti.

Qazir jol-kólik oqıǵasyna, jolaýshynyń kóz jumýyna baılanysty tıisti is-qujattar jınalyp jatyr.

— Patrýldik polıtsııa rotasynyń qyzmetkerleri «ÝAZ» kóliginiń júrgizýshisine jol qozǵalysy erejelerin qatań saqtaý kerektigin eskertken. Alaıda, kólik júrgizýshisi jasalǵan eskertýlerge qaramastan jol apatyna sebepshi bolǵany anyqtaldy. Jol-kólik oqıǵasynyń aldyn alý maqsatynda qozǵalysqa qatysýshylarǵa jol erejesin qatań saqtaý kerektigin eskertemiz, — dep málim etti departamenttiń baspasóz qyzmetinen. 

Eske sala ketelik, buǵan deıin Atyraý oblysynda 15 qoıdy kólik basqanyn, keıin 32 jastaǵy júrgizýshi 3 adamdy qaǵyp ketkenin jazǵan bolatynbyz.