Atyraýda pırotehnıkany ruqsatsyz satqan kásipkerlerge 1,5 mln aıyppul salyndy

<p>ATYRAÝ. KAZINFORM &ndash; Atyraýda &laquo;Pırotehnıka&raquo; birlesken reıdi kezinde 33 ákimshilik is qozǵaldy. Pırotehnıka zattaryn satý talabyn buzǵan kásipkerlerge 1,5 mln aıyppul salyndy.</p>

Atyraý oblystyq tótenshe jaǵdaılar departamenti memlekettik órt baqylaý basqarmasy bastyǵynyń orynbasary Dáýren Berdenovtiń málimetine súıensek, byltyrǵy 14 jeltoqsannan bıylǵy 1 qańtarǵa deıin «Pırotehnıka» profılaktıkalyq is-sharasy ótkizilgen. 

– Bul is-sharanyń negizgi maqsaty – turǵyndardyń qaýipsizdigin saqtaýǵa kóńil aýdarý. Atalǵan is-shara aıasynda oblystyq polıtsııa departamentiniń qyzmetkerlerimen birge iri saýda ortalyqtary men bazarlarda reıd júrgizildi. Reıd kezinde 33 quqyq buzýshylyq anyqtalyp, ákimshilik is qozǵaldy. Pırotehnıka zattaryn satýǵa baılanysty talapty buzǵan jeke kásipkerlerge jalpy somasy 1 mln 522 myń 950 teńge kóleminde aıyppul salyndy, -dep habarlady Dáýren Berdenov. 

Onyń aıtýyna qaraǵanda, anyqtalǵan quqyq buzýshylyqtardyń basym bóligin pırotehnıkalyq buıymdardy ruqsatsyz satý deregi qurap otyr. Sondaı-aq qaýipsizdik erejelerin saqtamaǵandar da bar. 

Eske sala ketelik, budan buryn jańa jyl túninde 15 atyraýlyq otbasynyń shyrqyn buzǵanyn habarlaǵan bolatynbyz.