Atyraýda onkologııa dıspanseriniń esebinde 5 myńnan asa naýqas tur

<p>ATYRAÝ. KAZINFORM &mdash; Atyraý oblysynda onkologııa dıspanseriniń esebinde 5 myńnan asa naýqas tirkelgen. Bul kórsetkish byltyrǵydan 9,2 paıyzǵa ósken. Naýqastardyń deni sút bezi obyry, odan keıin ókpe, toq ishek, jatyr moıny qaterli isigine shaldyqqan.</p>

Atyraý oblystyq onkologııa dıspanseri emhana bóliminiń meńgerýshisi Anar Qaısedenovanyń málimetinshe, halyqaralyq qaterli isikke qarsy kúres kúnine oraı «Ashyq esik» aktsııasyna 194 adam qatysqan. 

Dárigerlerdiń qabyldaýyna kelgenderdiń arasynan 64 adam kompıýterlik tomografııaǵa, 42-i ýltradybystyq zertteýge, 50-i rentgenge túsirilgen. Onyń ishinde 45 adamǵa mammografııa, beseýine rentgenografııa júrgizilgen. 

«Turǵyndar joldamasyz onkolog mamandardan keńes alyp, medıtsınalyq tekserýden ótti. Dáriger bir kúnde qaterli isikke kúmándi 8, al, qaterli isikaldy 21 jaǵdaıdy tirkedi. Al, 150-ge jýyq adamnan basqa aýrýdyń túrleri anyqtaldy», - deıdi Anar Qaısedenova.

Onyń aıtýynsha, qaterli isikten saýyǵýǵa bolady. Bul kúni qaterli isikten saýyqqan Talshyn esimdi dertpen kúresýdiń joly týraly áńgimelep berdi. 

«Qaterli dertpen kúresý ońaı emes. Oǵan eń aldymen senim, úmit jáne týysqandardyń qoldaýy qajet. Em-dom alǵannan soń aǵzamda oń ózgerister baıqaldy. Jaqsylyqty úrkitip almaıyn dep júrmin. Turǵyndarǵa arnalǵan osyndaı ashyq esik kúni men skrınıngtik tekserý jaman aýrýdyń aldyn alýǵa septigi tıedi. Tek sol múmkindikti ótkizip almasa eken»,- deıdi ol.

Eske sala ketelik, budan buryn Atyraýda 100 mln teńgeniń qurylǵysymen 2 jasar balanyń jelkesindegi isikke ota jasalǵanyn jazǵan edik.