Atyraý oblysynda esepte turǵan nashaqorlar arasynda 22 áıel bar
Atyraý oblystyq polıtsııa departamenti esirtki qylmysyna qarsy is-qımyl basqarmasy bastyǵynyń orynbasary Roman Ermuhanovtyń málimetinshe, jyl basynan beri zańsyz aınalymnan 143 kelige jýyq esirtki zattary tárkilengen.
«Jyl basynan beri oblysta esirtkige qarsy quqyq buzýshylyqtyń 120 deregi tirkeldi. Esirtki zattaryn tasymaldap júrgen 35 adam ustaldy. Zańsyz esirtkini tasymaldaýshylardyń arasynda 5 áıel, kámeletke tolmaǵan 1 jasóspirim bar», — deıdi Roman Ermuhanov.
Onyń aıtýynsha, esirtki quraldary tranzıtiniń jolyn kesý úshin birqatar is-shara qolǵa alynǵan. Ásirese, profılaktıkalyq jumysmqa nazar aýdarylyp otyr.
«Atyraý oblysynda shamamen 500-den astam nashaqor esepte tur. Esirtki tutynatyndardyń arasynda 22 áıel tirkelgen. Nashaqorlyqqa salynatyn jastar kóbeıdi. Qazir jastardyń úlesi nashaqorlardyń basym bóligin quraıdy. Osyǵan baılanysty ózge qurylymdarmen birlesken jumysty jandandyrýǵa kóńil aýdardyq», — deıdi Roman Ermuhanov.
Esirtki qylmysyna qarsy is-qımyl basqarmasynyń aǵa jedel ýákili Marıana Janǵalıevanyń aıtýyna qaraǵanda, polıtsııa qyzmetkerleri kúndiz-túni qylmyspen kúresý, aldyn alý, qoǵamdyq qaýipsizdikti qamtamasyz etýge jumylǵan.
«Polıtsııa qyzmetkerleri úkimettik emes uıym ókilderin, eriktiler men qoǵam belsendilerin, sportshylar men ózge de organdardy esirtkige qarsy profılaktıkalyq jumys júrgizýge tartyp otyr. Maqsatymyz — nashaqorlyqtyń taralý qaýpi týraly habardar etý, salamatty ómir saltyn nasıhattaý, esirtkiniń zańsyz aınalymyna qatysýdyń quqyqtyq saldaryn túsindirý. Jyl basynan beri osy maqsatta 500-ge jýyq is-shara ótkizildi», — deıdi Marıana Janǵalıeva.
Eske sala ketelik, buǵan deıin Atyraýda 6 aıda zańsyz aınalymnan 8 keliden astam esirtki tárkilengenin jazǵan edik.