Atyraýda munaı kompanııasy memleketke 673,1 mln zalal keltirgen
Atyraý oblysy prokýratýrasynyń aqparatyna qaraǵanda, «ANACO» JShS 2018-2023 jyldary aralyǵynda jer qoınaýyn utymsyz paıdalanǵan.
«Jer qoınaýyn paıdalanýǵa qatysty zańdylyqtyń saqtalýyna turaqty qadaǵalaý júrgizilip keledi. Máselen, «ANACO» JShS 2018-2023 jyldary aralyǵynda 4 237 248 tekshe metr shıki gazdyń joǵalýyna jol bergeni anyqtaldy. Bul – «Jer qoınaýy jáne jer qoınaýyn paıdalaný týraly» kodekstiń 125-babynyń 2-tarmaǵy jáne 147-babynyń 4-tarmaǵynyń talaptaryn óreskel buzý. Zańdylyqqa sáıkes kómirsýtekterdi óndirý onyń joǵalýyn boldyrmaıtyn ádister men tásilder arqyly júzege asyrylýy kerek. Qadaǵalaý aktisiniń negizinde Munaı-gaz keshenindegi memlekettik ınspektsııasynyń batys óńiraralyq basqarmasynyń mamandary memleketke keltirilgen zalal mólsherin eseptedi. Zalal kólemi 673 mln 130 myń 278 teńgeni qurady. Jer qoınaýyn paıdalanýshy kompanııa erikti túrde zalaldyń 285 mln teńgesin tóledi», - habarlady oblystyq prokýratýradan.
Eske sala ketelik, budan buryn Atyraýdaǵy munaı kompanııasyna 13,6 mlrd teńge aıyppul salynǵanyn habarlaǵan bolatynbyz.
«Kaspıı neft» AQ-nyń 2021-2022 jyldary burǵylaý jáne ken ornyn paıdalaný kezinde 4500 tonnadan astam qaýipti qaldyqtarǵa jınaqtalý lımıtin almaǵany anyqtaldy. Prokýrordyń usynysyen Atyraý oblystyq sotynyń sot alqasynyń 2 shildedegi qaýlysymen kompanııaǵa QR Ákimshilik quqyq buzýshylyq týraly kodeksiniń 328-babymen 13 684 868 730 teńge aıyppul salyndy.