Atyraýda mopedpen kólikke soǵylǵan 15 jasar jetkinshektiń anasy aıyppul tóledi

<p>ATYRAÝ. KAZINFORM — Atyraý oblysydaǵy Qulsary qalasynda 15 jasar jasóspirim mopedpen kólikke soqtyǵysqan. Ulynyń áreketi úshin anasy aıyppul tóledi.</p>

Atyraý oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda jasóspirimniń anasy R.S-ǵa qatysty QR Ákimshilik quqyq buzý týraly kodeksiniń 127-babynyń 3-bóligimen ákimshilik is qaraldy. 

«R.S-nyń kámeletke tolmaǵan 15 jasar uly N.L. bıylǵy mamyr aıynda Qulsary qalasynda „Samýraı“ mopedin júrgizýshi kýáliginsiz júrgizip, Toyota Camry markaly kóligimen soqtyǵysqan. Anasynyń ulyn tárbıeleý jónindegi mindetterin tıisinshe oryndamaýy saldarynan kámeletke tolmaǵan jasóspirimniń ákimshilik quqyq buzýshylyq belgileri bar qasaqana is-áreket jasaýyna alyp kelgen. R.S.-niń kinási is qujattarymen tolyq dáleldendi. Ol sotta kinásin moıyndap, ulynyń áreketi úshin keshirim surady», -dep habarlady oblystyq sottyń baspasóz qyzmeti.

Sot qaýlysymen R.S. joǵaryda kórsetilgen bappen kináli dep tanyldy.

Onyń jeke basy, jaýapkershiligin jeńildetetin mán-jaı, quqyq buzýshylyqtyń sıpaty eskerildi.

Oǵan 51 688 teńge kóleminde ákimshilik aıyppul salyndy. 

Sot qaýlysy zańdy kúshine endi.

Eske sala ketelik, buǵan deıin Atyraýda jyl basynan beri moped júrgizýshileriniń kinásinen 17 jol oqıǵasy bolǵanyn habarlaǵan edik.