Atyraýda mektep esepshisi jalaqy qorynan 32,6 mln teńgeni óz esepshotyna aýdarǵan

<p>ATYRAÝ. KAZINFORM &ndash; Atyraýdaǵy mektepterde jalaqy qarjysyn zańsyz aýdarý deregi anyqtalyp otyr. Bir esepshi óziniń esepshotyna 32,6 mln teńge aýdaryp alǵan.&nbsp;</p>

Atyraý oblystyq ishki memlekettik aýdıt departamenti basshysynyń orynbasary Zoıa Saparovanyń deregine súıensek, óńirdegi 19 bilim berý mekemelerine monıtorıng júrgizilip, 98,3 mln teńgege 42 den qoıý sharasy qoldanylǵan.

– Departament aýdıtorlary jalaqy qorynan iri kólemdegi qarjyny zańsyz aýdarýǵa baılanysty birneshe derekti anyqtady. Máselen, Atyraý qalasyndaǵy №36 mektep-gımnazııasynyń esepshisi óziniń esepshotyna 32 mln 666,5 myń teńgeni jáne jeke tulǵanyń esepshotyna 15 mln teńgeni aýdaryp jibergen. Al A.Pýshkın atyndaǵy №20 mektep-lıtseıiniń qyzmetkerine 3 mln 912 myń teńge aýdarylǵany anyqtaldy, - deıdi Zoıa Saparova.

Onyń málimetinshe, den qoıý sharalarynyń nátıjesinde bıýdjetke 6 mln 224,3 myń teńge qaıtarylǵan. 

– Qarjy jymqyrý derekteriniń aldyn alý, keleńsizdikterdi boldyrmaý maqsatynda bıýdjettik, onyń ishinde bilim berý salasyndaǵy mekemelerdegi jalaqy tóleý júıesine turaqty monıtorıng júrgizilip keledi. Anyqtalǵan jymqyrý derekteri týraly bıýdjettik baǵdarlama ákimshisine, Sybaılas jemqorlyqqa qarsy is qımyl agenttiginiń oblystyq departamentine, Memlekettik qyzmet isteri agenttiginiń aýmaqtyq organyna bir mezgilde aqparat berildi. Maqsat – bıýdjet qarjysyn qaıta qaraýǵa, artyq aýdarylǵan bıýdjet qarjyny qaıtarýdy qamtamasyz etý, - dep málim etti Zoıa Saparova.

Eske sala ketelik, buǵan deıin Atyraýda 2 balabaqsha esepshileri bıýdjet qarjysyn jeke esepshotqa aýdaryp jibergenin jazǵan bolatynbyz.