Atyraýda medıtsına mekememeleriniń dırektorlary JOO-da oqý úshin bıýdjettiń 10,5 mln teńgesin jumsaǵan
Sybaılas jemqorlyqqa qarsy is-qımyl agenttigi Atyraý oblystyq departamenti basshysynyń birinshi orynbasary Nurlan Jahınniń aıtýynsha, sybaılas jemqorlyq táýekelderiniń jol kartasy iske asyrylyp jatyr.
«Jol kartasyna ázirleý kezinde óńirdegi sheshimi tappaǵan túrli problema eskerildi. Túıindi máseleler qyzmet kórsetý jáne túrli protsesterdiń ashyq emestiginen, ákimshilik kedergiler men zańnamanyń jetilmegendiginen týyndaıdy. Negizgi basymdyq – turǵyndardyń áleýmettik turmysyn jaqsartýǵa baılanysty máselelerin sheshý, olardyń ómir súrý sapasyn jaqsartý», - deıdi Nurlan Jahın.
Onyń pikirinshe, jol kartasyna Atyraý oblysynan 9 problemalyq másele engizilgen. Bul – ekologııa, olıgopolııa, jol jáne ınfraqurylym, medıtsına, bıznesti qorǵaý, apatty jáne tozyǵy jetken turǵyn úı, agroónerkásiptik keshen, jylý-elektr stansalary men uzaqqa sozylǵan qurylys nysandary.
«Bıylǵy 6 aıda atalǵan salalardaǵy sybaılas jemqorlyq táýekelderine taldaý júrgizildi. Onyń ishinde áleýmettik qoldaý salasynda eńbekaqy tóleý qorynan bólingen qarajatty urlaý, granttar berý, ataýly áleýmettik kómek alý, áleýmettik maqsattaǵy nysan salý, múgedek jandardyń quqyqtaryn shekteý, patsıentter úshin azyq-túlik satyp alýǵa bólý kezindegi táýekelder anyqtaldy. Máselen, densaýlyq saqtaý salasynda baǵany jasandy túrde kóterý, medıtsınalyq buıymdardy maqsatsyz paıdalaný, múddeler qaqtyǵysy, eńbekaqy tóleý qorynan qarjy urlaý deregi bar. Medıtsınalyq mekemelerdiń dırektorlary joǵary oqý oryndaryndaǵy oqýyna 10,5 mln teńge jumsapty. Bul qarjy bıýdjetke qaıtaryldy», -dep habarlady Nurlan Jahın.
Sondaı-aq, jol salasyna júrgizilgen qoǵamdyq monıtorıng kezinde 50-den astam buzýshylyqtar anyqtalǵan. Alaıda, merdiger kompanııalar ony osy kezge deıin joıǵan joq.
«Óńirde merzimi uzarǵan qurylys nysandaryna monıtoorıng júrgizildi. Sondaı nysannyń biri Maqat aýdanynda bar. Munda 60 páterlik 3 qabatty turǵyn úı qurylysy áli aıaqtalmaı tur. Qazir nysan qurylysy qaıta jandandy», - dep málim etti Nurlan Jahın.
Onyń deregine qaraǵanda, «Bızneske jol» jobasy shaǵyn jáne orta bıznes ıeleriniń quqyqtaryn qorǵaýǵa arnalǵan. Osy kezge deıin 1 myńǵa jýyq kásipkerdiń quqyǵy qorǵalǵan.
«Bizdiń departamenttiń qyzmetkerleriniń jumysy tek táýekel kartasymen shektelmeıdi. Ózge de salalarda sybaılas jemqorlyq táýekelderin joıý baǵytyndaǵy jumys jalǵasyp jatyr. Atap aıtqanda, sport salasynda jalǵan dıplomy bar jattyqtyrýshylar, sondaı-aq, buryn sottalǵan adamdardy jumysqa qabyldaý faktileri anyqtaldy», -dedi Nurlan Jahın.
Qazir ekologııa salasyndaǵy sybaılas jemqorlyq táýekelderine syrtqy taldaý bastaldy.
Eske sala ketelik, buǵan deıin Maqat aýdanynda úsh jyl buryn bastalǵan turǵyn úıdiń qurylysy bitpeı turǵanyn jazǵan edik.