Atyraýda maýsymnan beri 49,9 mln balyq shabaǵy qutqaryldy
Jaıyq-Kaspıı oblysaralyq basseındik balyq sharýashylyǵy ınspektsııasynyń basshysy Nurlybek Ǵaısınniń aıtýynsha, Mahambet aýdanynyń Beıbarys aýylynyń aýmaǵyndaǵy Saryózek kanalynan 520 myńnan astam balyq shabaǵy qutqarylǵan.
«Kóktemgi sý tasqynynyń saldarynan Jaıyq ózeni arnasynan asyp, Saryózek kanalyna quıylǵan. Tasqyn sýmen birge arnaǵa balyq shabaqtary túsken. Maýsym aıynda Jaıyq ózenindegi sý deńgeıi turaqtandy. Al, tasqyn sý arnada ósken balyq shabaqtarymen birge jınalyp qalǵan», -deıdi Nurlybek Ǵaısın.
Onyń aıtýyna qaraǵanda, arnada jınalǵan balyq shabaqtaryn tirileı saqtap qalý úshin nasos arqyly sý jiberilip jatyr. Balyq shabaqtaryn qutqarý jumystary jalǵasa beredi.
«Qutqarylǵan balyq shabaqtarynyń túri áralýan. Máselen, sazan, taban, kókserke, jaıyn, móńke shabaqtarynyń ortasha salmaǵy — 12-14 gramm. Bıylǵy maýsym aıynan beri Atyraý oblysynyń sý aıdyndarynan 49 mln 920 myńnan astam balyq shabaqtary qutqaryldy. Onyń ishinde Qurmanǵazy aýdanynyń aýmaǵynan 39 mln 900 myń, Inder aýdanyndaǵy sý aıdyndarynan 8 mln 500 myń, Mahambet aýdanynan 1 mln 520 myń, Atyraý qalasynda 35,5 myń dana balyq shabaǵy qutqarylyp, Jaıyq ózenine jiberildi», -dep málim etti Nurlybek Ǵaısın.
Eske sala ketelik, buǵan deıin Atyraýda Saryózek kanalynan 80 keli ólgen shabaq jınalǵany habarlanǵan edi.