Atyraýda qos azamattyǵyn jasyrǵan er adamǵa 516 myń teńge aıyppul salyndy

<p>ATYRAÝ. KAZINFORM &ndash; Atyraýda er adam 1 jyldan beri qos azamattyǵyn jasyryp kelgen. Oǵan 516 myń teńge aıyppul salyndy.</p>

Atyraý oblystyq polıtsııa departamenti baspasóz qyzmetiniń málimetinshe, jyl basynan beri qos azamattyǵy bar 17 adam anyqtalǵan.

«Sot sheshimimen 15 adamǵa aıyppul salyndy. Al, 2 adam Qazaqstan Respýblıkasynyń aýmaǵynan ákimshilik jolmen shyǵaryldy. Máselen, Qurmanǵazy aýdanynyń 47 jastaǵy turǵyny 2002 jyly alǵash ret Qazaqstan azamatynyń jeke basyn kýálandyratyn qujattaryn rásimdegen. Alaıda, 2023 jyly Reseı Federatsııasynyń azamattyǵyn qabyldap, sol jyly shilde aıynda sol eldiń azamattyǵyn kýálandyratyn qujattaryn alǵan. Er adamǵa qatysty QR azamattyq týraly zańnamasyn buzý, ıaǵnı el zańnamasynda belgilengen merzimderde shetel azamattyǵyn alý faktisin habarlamaý boıynsha ákimshilik hattama toltyryldy. Іs qujattary protsessýaldyq sheshim qabyldaý úshin Qurmanǵazy aýdandyq sotyna joldandy. Sot sheshimimen qos azamattaǵy bar er adam kináli dep tanyldy. Oǵan 140 aılyq eseptik kórsetkish – 516 myń 880 teńge kóleminde aıyppul salyndy. Aıyppul memleket paıdasyna óndirildi», - dep habarlady departamenttiń baspasóz qyzmeti.

Atalǵan derek negizinde 47 jastaǵy er adam Qazaqstan azamattyǵynan aıyrylǵany tirkeldi. Soǵan baılanysty málimetter tıisti aqparattyq júıelerge engizildi.

Eske sala ketelik, budan buryn Atyraýda qos azamattyǵy bar áıelge 500 myń teńge aıyppul salynǵanyn habarlaǵan edik.