Atyraýda kórshi óńir turǵyndarynan esirtki men tapansha tárkilendi

<p>ATYRAÝ. KAZINFORM &mdash; Atyraý oblysynyń polıtseıleri 4 kúnde 2 keliden astam esirtki tárkiledi. Esirtkiniń naryqtaǵy quny 30 mln teńgeden asady.</p>

Atyraý oblystyq Polıtsııa departamenti baspasóz qyzmetiniń aqparatyna súıensek, 5-9 aqpan kúnderi «Tosqaýyl» jedel-profılaktıkalyq is-sharasy ótkizilgen.

«Іs-sharanyń maqsaty – zańsyz esirtki aınalymyn anyqtap, arnalaryn joıý. Oblys aýmaǵynda ótkizilgen is-shara kezinde esirtkige qatysty 8 qylmystyq quqyq buzýshylyq anyqtalyp, 9 adam qamaýǵa alyndy. Anyqtalǵan qylmystyq quqyq buzýshylyq boıynsha 30 mln teńge bolatyn jalpy salmaǵy 2 keli 587 gramm esirtki zaty tárkilendi. Onyń ishinde 1 keli 845 gramm sıntetıkalyq, 742 gramm gashısh esirktisi bar. Máselen, telegram arnasy arqyly oblys aýmaǵynda sınetıkalyq esirtkini jasyryn tyǵý ádisi arqyly satpaq bolǵan degen kúdikpen Mańǵystaý oblysynyń 24 jastaǵy turǵyny anyqtalyp, ustaldy. Onyń mekenjaıyn tintý kezinde 1 keliden astam sıntetıkalyq esirtki zaty tabyldy. Al Batys Qazaqstan oblysynyń eki turǵyny turatyn páterden 23 gramm sıntetıka men 2 tapansha tabyldy. Ustalǵandardyń bári ýaqytsha ustaý ızolıatoryna qamaýǵa alyndy», - dep habarlady departamenttiń baspasóz qyzmeti.

Sondaı-aq esirtki zattaryn jarnamalaıtyn 10 ınternet-saıt buǵattalǵan. Respýblıkalyq izdeýde júrgen eki kúdikti ustaldy.

Eske sala ketelik, budan buryn Atyraýda ózge óńirden kelgen eki boıjetkennen sıntetıkalyq esirtki tárkilengenin jazǵan bolatynbyz.