Atyraýda kópqabatty úıdiń terezesinen qulaǵan 3 jasar sábıdiń jaǵdaıy aýyr

<p>ATYRAÝ. KAZINFORM — Atyraýda 3 jasar sábı kópqabatty úıdiń terezesinen qulap ketti. Jedel járdem brıgadasy zardap shekken sábıdi oblystyq balalar aýrýhanasyna jetkizdi.</p>

Bul týraly áleýmettik jeli men WhatsApp messendjerinde vıdeo tarady. Oqıǵa 16 qyrkúıekte Atyraý qalasyndaǵy «Nursaıa» shaǵynaýdanynda bolǵan. 

Bul týraly áleýmettik jeli men WhatsApp messendjerinde vıdeo tarady. Oblystyq densaýlyq saqtaý basqarmasynyń baspasóz qyzmeti bul derekti rastady. 

«Jedel járdem brıgadasynyń kóligimen kópqabatty turǵyn úıdiń terezesinen qulaǵan 3 jasar bala oblystyq balalar aýrýhanasyna jetkizildi. Naýqastyń jaǵdaıy óte aýyr. Qazir ol aýrýhananyń jansaqtaý bóliminde jatyr», -dep habarlady basqarmanyń baspasóz qyzmeti.

Eske sala ketelik, budan buryn Atyraý oblysynda jyl basynan beri 6 bala terezeden qulaǵanyn habarlaǵan bolatynbyz. 

Atyraý oblystyq tótenshe jaǵdaılar departamenti tótenshe jaǵdaılardyń aldyn alý bóliminiń bastyǵy, azamattyq qorǵaý maıory Sábıt Borashevtyń aıtýynsha, keıingi kezde balalardyń jazataıym oqıǵaǵa ushyraýy jıilegen.

«Ásirese, 2-7 jasqa deıingi balalardyń terezeden qulaýy kóbirek kezdesedi. Negizgi sebep — ońaı ashylatyn plastıkalyq tereze. Ata-analar balalarynyń qaýipsizdigine salǵyrttyq tanytady. Kópshiligi balalaryn úıinde qaraýsyz qaldyryp ketedi. Osyndaı sebeptiń saldarynan jyl basynan beri 6 bala terezeden qulady», — deıdi Sábıt Borashev.