Atyraýda kópbalaly ana turǵyn úı kezegin sot arqyly qalpyna keltirdi

<p>ATYRAÝ. KAZINFORM &mdash; Atyraý oblysynda kópbala anany turǵyn úı kezeginen negizsiz alyp tastaǵan. Quqyǵy buzylǵan áıel sotqa júgindi.</p>

Atyraý oblysynyń mamandandyrylǵan aýdanaralyq ákimshilik sotynyń aqparatyna súıensek, kópbalaly ana turǵyn úı kezegin qalpyna keltirý úshin shaǵymdanǵan.

«Talap qoıýshy A. «Jylyoı aýdany turǵyn úı-kommýnaldyq sharýashylyǵy, jolaýshylar kóligi, avtokólik joldary turǵyn úı ınspektsııasy bólimi» memlekettik mekemesiniń ózin turǵyn úıge kezeginen alyp tastaý áreketin daýlady. Jalǵyz basty ananyń asyraýynda kámeletke tolmaǵan 5 balasy bary jáne úı jaldap turatyny anyqtaldy.

QR Turǵyn úı qatynastary týraly Zańynyń 73 babynyń 5) tarmaqshasyna sáıkes, turǵynjaıǵa muqtaj dep tanylǵan jáne turǵynjaı alǵanǵa deıin esepke qoıylǵan kópbalaly analar, kópbalaly otbasylar esepten shyǵarylyp tastaýǵa jatpaıdy. Іsti qaraý barysynda taraptar sýdıamen júrgizilgen medıatsııalyq kelisimge keldi. Medıatsııalyq kelisimniń sharttaryna sáıkes, jaýapker talap qoıýshynyń turǵyn úıge kezegin bir aı ishinde qalpyna keltirýge mindettendi», -dep habarlady sottyń baspasóz qyzmeti.

Atyraý oblysynyń mamandandyrylǵan aýdanaralyq ákimshilik sotynyń uıǵarymymen daýdy medıatsııa tártibinde retteý týraly kelisim bekitildi. Kelisimdi oryndamaýdyń saldary qandaı bolatyny taraptarǵa túsindirildi.

Sot uıǵarymy zańdy kúshine engen joq.

Eske sala ketelik, budan buryn Atyraýda básekelestikti qorǵaý zańnamasyn buzǵandardan 690 mln teńge óndirilgenin jazǵan edik.