Atyraýda kóp balaly ana turǵyn úı kezeginen zańsyz shyǵarylǵan

<p>ATYRAÝ. KAZINFORM &ndash; Atyraýda 36 jastaǵy 4 balanyń anasy 2015 jyldan beri &laquo;kóp balaly otbasy&raquo; sanatyndaǵy baspana kezeginde turǵan. Alaıda, 2023 jyldyń jeltoqsan aıynda kúıeýiniń úıge menshik quqyǵyn tirkegeni anyqtalýyna baılanysty ol turǵyn úıge muqtajdar tiziminen shyǵarylǵan.</p>

Atyraý oblystyq soty baspasóz qyzmetiniń málimetinshe, kóp balaly áıel turǵyn úı-kommýnaldyq sharýashylyq bólimi men turǵyn úı ınspektsııasynyń bul áreketine baılanysty sotqa shaǵymdanǵan.

«Sotta ol bul jer teliminiń kúıeýine ýaqytsha paıdalanýǵa berilgenin túsindirdi. Úı salýǵa qarajaty joq otbasy ony senimhat arqyly satyp jibergen. Al, satyp alýshy jer telimine 2019 jyly turǵyn úı salyp, keıin ony zańmen resimdegen. Sot talap qoıýshynyń kúıeýiniń jeke menshik quqyǵynda tirkelgen turǵyn úı ǵımaraty bolǵanymen, ol tek úı salynǵan ýchaskeniń ıesi bolyp tabylmaıtynyn anyqtady. «Turǵyn úı qatynastary týraly» Zańnyń 73-babynyń 1-tarmaǵynyń 5) tarmaqshasyna sáıkes turǵyn úı alýǵa muqtaj jáne ony alǵanǵa deıin esepte turǵan kóp balaly analar men otbasylar esepten shyǵarýǵa jatpaıdy», - dep habarlady oblystyq sottyń baspasóz qyzmeti.

Sot zań talabyn eskerip, kóp balaly áıeldiń talabyn qanaǵattandyrdy. Turǵyn úı-kommýnaldyq sharýashylyq bólimi men turǵyn úı ınspektsııasyna turǵyn úı kezeginde turǵan kóp balaly ananyń kezegin qalpyna keltirýdi mindettedi.

Sot sheshimi zańdy kúshine endi. 

Eske sala ketelik, budan buryn tasqyn sý basqan Qulsarynyń turǵyndaryna 62 úı berilgenin  habarlaǵan edik.