Atyraýda kóbinde aýqatty, tolyq otbasynan shyqqan balalar ózine qol jumsaýǵa beıim - ákim orynbasary

<p>Bıyl Atyraý oblysynda 38 jasóspirim sýıtsıd jasamaq bolǵan. Onyń ishinde 9 jasóspirimge der kezinde kómek berilmegen, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Atyraý oblysy ákiminiń orynbasary Jasulan Bısembıevtiń aıtýynsha, ózine qol jumsaýǵa beıim jasóspirimder sany artqan.

— Sońǵy kezderi jasóspirimderdiń psıhologııalyq-emotsıonaldyq jaı-kúıi alańdata bastady. Olaı deıtinim, Atyraý oblysynda ózine qol jumsaýǵa umtylǵan balalardyń sany artyp otyr. Kórsetkish byltyrǵy jylmen salystyrǵanda eki ese ósken. Bıyl 38 bala ózine qol jumsamaq bolǵan. Ókinishke qaraı, 9 jasóspirimge jaqyndary tarapynan der kezinde kómek berilmegen. Qaıǵymen aıaqtalǵan sońǵy eki oqıǵany aıtaıyn. Jaqynda ata-anasyna renjigen 14 jasar qyz ben 15 jasar ul bıikten sekirip ketti. Biri kópqabatty úıden, ekinshisi kópirden qulaǵan, -dep habarlady Jasulan Bısembıev.

Onyń aıtýyna qaraǵanda, jasóspirimderdiń sýıtsıd jasaý sebebine taldaý júrgizilgen.

Foto: Foto: GOV.KZ

— Taldaý kórsetkendeı, kóz jumǵan balalardyń basym kópshiligi — tolyq ári aýqatty otbasynan. Alaıda júrgizilgen zertteýlerge sáıkes, mundaı áreketke ata-anasymen, keıde dostarymen kelispeı qalǵan balalar beıim eken. Sondyqtan, ata-analar balasymen meıilinshe ashyq sóıleskeni jón. Olarmen kóbirek ýaqyt ótkizip, syrlasyna aınalýy kerek, -dep málim etti Jasulan Bısembıev.

Ákim orynbasarynyń deregine súıensek, jergilikti bılik mektepterdegi psıhologtardyń oqýshylarmen jumysyn kúsheıtkeli otyr.

Oblystyq bilim basqarmasy janynan jasóspirimderdi psıhologııalyq qoldaý ortalyǵyn ashylady.

Bul ortalyqta emotsıonaldyq turaqsyzdyqqa tap bolǵan balalarǵa ádistemelik qoldaý kórsetiledi. Sondaı-aq, arnaıy call-center iske qosylady.

Eske sala ketelik, budan buryn Atyraýda 15-qabattyń balkonynan sekirýge oqtalǵan áıel qutqarylǵanyn jazǵan edik.