Atyraýda qyzylsha aýrýyn juqtyrǵandar aýrýhanaǵa ózderi barǵan
Atyraý oblysy ákiminiń orynbasary Jasulan Bısembıevtiń tóraǵalyǵymen ótken jıynda densaýlyq salasyndaǵy túıtkildi máseleler talqylandy. «KazMedProekt» JShS mamany Erik Shonbaevtyń aıtýynsha, densaýlyq saqtaý salasynda eki ózekti másele bar.
– Birinshiden, salada kadr jetispeıdi. Osyǵan baılanysty kadrmen qamtýdy jetildirýdi usynamyn. Ekinshi ózekti másele, jol-kólik apattarynan bolatyn ólim-jitimniń kóbeıýine baılanysty bolyp otyr. Osyndaı oqıǵalardan bolatyn ólimniń 70 paıyzy jedel járdem brıgadasy kelgenge deıin tirkeledi. Sol sebepten, jedeldilikti attyrýymyz kerek, - dedi Erik Shonbaev.
Al oblystyq densaýlyq saqtaý basqarmasy basshysynyń orynbasary Almagúl Ábilovaniń deregine súıensek, ólim kórsetkishi tómendegen.
– Máselen, byltyr oblysta ólim kórsetkishi 100 myń adamǵa shaqqanda 3,9 paıyz bolsa, bıyl 3,5 paıyzǵa tómendedi. Náreste ólimi 9 paıyzdan 7,4 paıyzǵa azaıdy. Aımaqta turaqty tabıǵı ósim bar. Júkti áıelderge ambýlatorııalyq qyzmet deńgeıi men skrıngti tekserý kórsetkishi Qurmanǵazy, Isataı aýdandyq aýrýhanalarynda tómen, -dep habarlady Almagúl Ábilova.
Atyraý oblystyq №2 aýrýhananyń dırektory Nadıa Erǵalıevanyń málimetinshe, qyzylshany aýrýyn juqtyrý kórsetkishi artqan. Tez juǵatyn aýrýdyń órshýi vaktsınadan bas tartýshylardyń kóptiginen bolǵan.
– Bıyl tamyz aıynda qyzylshany 45 adam juqtyrdy. Qyrkúıektegi kórsetkish – 201 derek. Qyzylsha dıagnozymen byltyr 2 adam, bıyl 9 aıda 444 juqtyrýshy tirkeldi. Qyzylsha aýrýyn juqtyrǵandar aýrýhanaǵa ózderi kelip júr. Bul – óreskel qatelik. Juqpaly aýrýdy juqtyrǵan adamdaar óz úıinde oqshaýlanýǵa, nemese aýrýhanaǵa jedel járdem brıgadasynyń kóligimen jetkizilýge tıis, -dep málim etti Nadıa Erǵalıeva.
Oblys ákiminiń orynbasary Jasulan Bısembıevtiń pikirinshe, qyzylsha aýrýyna qarsy kúres tómen deńgeıde qalyp otyr.
– Qyzylshamen kúres áli de «shıki». Aýdandarda kórsetkishter kóńil qýantpaıdy. Turǵyndardy aqparattandyrý deńgeıi tómen. Buqara áli bul derttiń qaýipti ekenin sezinbeı otyr. Sol sebepten, qyzylsha aýrýyna qarsy kúresti jandandyrý úshin arnaıy komıssııa quryp, jaǵdaıdy tolyq baqylaýǵa alýymyz kerek, - dedi Jasulan Bısembıev.
Eske sala ketelik, budan buryn Atyraý oblysynda qazan aıynda tumaý men JRVI juqtyrý deregi kóbeıgenin jazǵan edik.