Atyraýda kıik aýlaǵandardan 335 múıiz tárkilenip, 283 mln teńge aıyppul óndirildi
Atyraý oblystyq polıtsııa departamenti tabıǵat qorǵaý polıtsııa tobynyń aǵa ınspektory Nurlybek Qanatovtyń málimetinshe, kesheden beri «Kıik-2024» tabıǵatty qorǵaý aktsııasy ótip jatyr.
«Bul aktsııany ótkizýdiń birneshe maqsaty bar. Birinshiden, kıik popýlıatsııasyn qorǵap, sanyn kóbeıtýge yqpal etý. Ekinshiden, brakonerlerge qarsy kúres kúsheıtilip, quqyq buzýshylarǵa qatań jaza qoldanylady. Máselen, bıyl jyl basynan beri oblysta janýarlar dúnıesin qorǵaýǵa qatysty 83 quqyq buzýshylyq anyqtaldy. Quqyq buzýshylardan 335 dana kıik múıizi, 7 tirkelmegen tegis uńǵyly ańshy qarýy tárkilendi», - deıdi Nurlybek Qanatov.
Al, oblystyq orman sharýashylyǵy jáne janýarlar dúnıesi aýmaqtyq ınspektsııasynyń bas mamany Mereke Shalharovtyń pikirinshe, kıiktiń kóbeıýine keri áser etetin qaýipti sebepter bar.
«Aldymen bul jaıt brakonerlikke qatysty bolyp otyr. Ekinshiden, tabıǵı sıpattaǵy apattardyń yqpaly bar. Úshinshiden, kıik mekendeıtin jer azaıdy. Byltyr 7 qylmystyq is tirkelip, sotqa joldanǵan edi. Sonyń nátıjesinde óndirilgen qarjy 6,5 mlrd teńgeni qurady. Al, bıyl tirkelgen qylmystyń 4-eýi sotqa joldandy. Kıikti zańsyz aýlaýshylardan 283 mln teńgege jýyq qarjy memleket paıdasyna óndirildi. Ózge qylmystyq ister ekeýi tergelip jatyr», - dep habarlady Mereke Shalharov.
«Ohotzooprom «ÓB» RMQK bas dırektordyń orynbasary Baqtııar Ramazanovtyń aıtýyna qaraǵanda, qazir aýa raıynyń salqyndaýyna baılanysty kıiktiń kóshi-qony aýystyrady.
«Qazir kıikter Atyraý oblysyna qaraı baǵyt aldy. Sol sebepten, bizdegi arnaıy jasaq toptary kúsheıtildi. Kıiktiń qozǵalysyn baqylaýǵa 225 ınspektor tartylyp otyr. Olarǵa 150-ge jýyq kólik bólindi», - dep málim etti Baqtııar Ramazanov.
Eske sala ketelik, buǵan deıin Atyraýda brakonerlerden bir aıda 300-den asa keli bekire tárkilengenin jazǵan edik.