Atyraýda kásipkerden 2 mln teńge bopsalaǵan bloger ustaldy

<p>ATYRAÝ. KAZINFORM &mdash; Atyraýda jergilikti bloger kásipkerden 2 mln teńge bopsalap, sot ǵımaratyndaǵy qyzmettik bólmede ilýli turǵan kıimniń qaltasynan aqsha urlaǵan. Qazir ol qamaýǵa alyndy.&nbsp;</p>

Atyraý oblystyq polıtsııa departamentiniń baspasóz qyzmetinen málim etkendeı, qazirgi kezde sotqa deıingi tergeý bastalǵan. 

«Atyraý qalalyq polıtsııa basqarmasynyń qyzmetkerleri 26 jastaǵy blogerdi ustady. Bloger jeke kásipkerdiń qyzmetin beınejazbaǵa túsirip, aqsha berseń áleýmettik jelige júktemeımin jáne quzyrly organdarǵa habarlamaımyn dep, odan 2 mln teńge bopsalaǵan. Kúdikti aqpan aıy bastalǵaly kásipkerdiń ıeligindegi azyq-túlik satatyn markettiń qyzmetin birneshe márte beınejazbaǵa túsirgen, taýar salynǵan sórelerin aqtaryp, shý shyǵarǵan. Tegin azyq-túlik alý úshin 47 myń teńgeni quraıtyn taýardyń aqysyn tólemeı ketken. Blogerdiń sot ǵımaratynyń qyzmettik bólmesindegi kıim qaltasynan 20 myń teńge urlaǵany anyqtaldy», - dep habarlady departamenttiń baspasóz qyzmeti.

Qazir kúdikti qamaýǵa alyndy. Oǵan qatysty urlyq jáne bopsalaý deregimen sotqa deıingi tergeý amaldary júrip jatyr. 

«Kúdiktiniń ózge de qylmysqa qatysyn tekserý bastaldy. Osyǵan baılanysty qandaı da bir aqparatty biletinder men kýá bolǵandardyń 102 arnasyna habarlasýyn suraımyz», - dep málim etti departamenttiń baspasóz qyzmeti.

Eske sala ketelik, buǵan deıin kórshisiniń aýlasynan 3 qoı urlaǵan atyraýlyq 5 jylǵa sottalǵanyn jazǵan edik.