Atyraýda halyqqa qyzmet kórsetý ortalyǵynyń mamany múlik ıeleri týraly aqparatty joıyp jibergen
Atyraý qalasyndaǵy № 2 sotta «Azamattarǵa arnalǵan úkimet» KEAQ Atyraý fılıalynyń mamanynyń zańǵa qaıshy áreketi sotta qaraldy. Oǵan QR Qylmystyq kodeksiniń 206-babynyń 2-bóliminiń 1-tarmaǵymen (Aqparatty quqyqqa syıymsyz joıý nemese túrlendirý) aıyp taǵylǵan.
— Fılıal mamany 2022 jyldan 2023 jylǵa deıin jyljymaıtyn múlik ıeleriniń IP-mekenjaıy men elektrondyq tsıfrlyq qoltańbany paıdalanyp, qasaqana jáne paıdakúnemdik maqsatpen asa mańyzdy aqparattyq-kommýnıkatsııalyq ınfraqurylym obektilerimen baılanysty aqparattyq júıede qamtylǵan zańmen qorǵalatyn aqparatty zańsyz joıǵan. Aqparattyq júıege kórineý jalǵan aqparat engizý arqyly azamattar men memlekettiń quqyqtary men zańdy múddelerin eleýli túrde buzǵan. Onyń bul áreketi halyqqa qyzmet kórsetý ortalyǵynyń múddelerine qaıshy keledi, — dep habarlady sottan.
Osy iske baılanysty prokýror sottalýshyǵa 1 jyl merzimge bas bostandyǵyn shekteý jazasyn taǵaıyndaýdy usynǵan. Jábirlenýshi tarap sottalýshyǵa jaza taǵaıyndaý máselesin sottyń qaraýyna qaldyrdy. Al sottalýshy kinásin tolyqtaı moıyndap, bas bostandyǵynan aıyrmaýdy surady.
Sot jaza taǵaıyndaý kezinde sottalýshynyń jazasyn jeńildetetin mán-jaıdy eskerdi. Sottalýshynyń asyraýynda kámelet jasyna tolmaǵan 6 balasynyń bary, júktiligi qylmystyq jaýaptylyǵy men jazasyn jeńildetetin mán-jaı retinde tanyldy. Aýyrlatatyn mán-jaılar anyqtalmady.
— Sot úkimimen sottalýshy QR Qylmystyq kodesiniń aıyp taǵylǵan bappen kináli dep tanyldy. Oǵan jeńildetetin mán-jaılar eskerilip, kommertsııalyq nemese ózge de uıymdarda aqparattyq-kommýnıkatsııalyq ınfraqurylymǵa qol jetkizýge baılanysty laýazymdardy atqarý quqyǵynan 1 jyl merzimge aıyrý, 738 myń 400 teńge aıyppul salý jazasy taǵaıyndaldy, - dep málim etti sottan.
Sot úkimi zańdy kúshine endi.
Eske sala ketelik, budan buryn atyraýlyq kásipkerdiń dúkeninde 3,7 mln teńgeniń alkogoli zańsyz saqtalǵanyn habarlaǵan edik.