Atyraýda erekshe balalardy mektepke daıarlaıtyn ortalyq ashyldy
Ortalyq dırektory Saıragúl Zaıdollanyń aıtýynsha, munda balalarǵa kommýnıkatsııalyq daǵdy men akademııalyq bilim úıretiledi. Ortalyqta taktıldi jáne dybystyq daǵdylardy damytýdy biriktiretin jeke baǵdarlama men erekshe tehnıka bar. Bul – áleýmettik-turmystyq baǵdarlaý, estý qabiletin damytý, Braıl, taktıl jáne ymmen sóıleýdi úırený sabaqtary. Ortalyqta 5 maman jumys isteıdi.
«Ózim kóp jyl tıflopedagog retinde erekshe balalarmen jumys istedim. Sol sebepten, tek teorııalyq bilimge ǵana emes, jeke tájirıbeme de súıenemin. Óıtkeni, erekshe balalarǵa erekshe kózqaras qajet. Sondyqtan olardy damytý úshin yntalandyrýshy orta qurýdy kózdedik. Qazir shahmat jáne fortepıano sektsııalary ashyldy. Bolashaqta erekshe balalarǵa arnalǵan balabaqsha men kásibı beıimdeý ortalyǵyn ashýdy josparlap otyrmyn», - deıdi joba avtory Saıragúl Zaıdolla.
Ol bul jobasyn jobasyn 2022 jyly jeke kabınet ashýdan bastaǵan. Al byltyr sheteldik kompanııanyń qarjylyq qoldaýymen iske asyrylatyn «Jarqyra» baǵdarlamasynyń áleýmettik jobalar baıqaýyna kórý jáne estý qabileti buzylǵan balalarǵa arnalǵan ortalyqty ashýdyń bıznes-josparyn usynǵan.
«Bul baıqaýdan 4 mln 200 myń teńgeniń grantyn utyp aldym. Grant qarjysyn ortalyqqa qajetti jabdyqtar, ádistemelik jáne dıdaktıkalyq materıaldar satyp alýǵa jumsadym», - deıdi Saıragúl Zaıdolla.
Eske sala ketelik, buǵan deıin Atyraý oblysynda múmkindigi shekteýli 273 adam turaqty jumysqa ornalasqanyn habarlaǵan bolatynbyz.