Atyraýda eki mektepte jarylǵysh zat qoıylǵany jóninde jalǵan habar berilgen

<p>ATYRAÝ. KAZINFORM &ndash; Atyraý qalasyndaǵy eki mektepke jarylǵysh zat qoıylǵany jóninde jalǵan habar berilgen. Bilim oshaqtarynan qaýipti zat tabylǵan joq.</p>

Atyraý oblystyq polıtsııa departamentiniń baspasóz qyzmetinen málim etkendeı, shahardaǵy eki mektepte jarylǵysh zat qoıylǵany týraly habar boıynsha anyqtaý, tekserý júrgizilgen. 

«Atyraý qalasyndaǵy 2 mektepte jarylǵysh zat bar dep kelgen habarlama boıynsha dereý anyqtap-tekserý jáne evakýatsııalaý jumystary júrgizildi. Oqıǵa ornyna tıisti quqyq qorǵaý organdarynyń qyzmetkerleri jumyldyryldy. Júrgizilgen jedel áreket nátıjesinde ǵımarattan eshqandaı jarylǵysh zat anyqtalǵan joq. Jalǵan habarlama berý deregi boıynsha tergep-tekserý júrgizilip jatyr. Kúdikti adamdy anyqtaý úshin keshendi jedel-izdestirý sharalary qolǵa alyndy. Qazir Atyraý qalasyndaǵy barlyq mekteptiń qaýipsizdigi polıtsııa qyzmetkerleriniń baqylaýynda ekenin qaperge beremiz», -dep habarlady departamenttiń baspasóz qyzmetinen.

Alaıda, polıtsııa departamentinen jarylǵysh zat qoıylǵany týraly jalǵan habardyń qashan, kimge berilgenin naqtylaǵan joq. 

QR Qylmystyq kodeksiniń 273-babynda (Terrorızm aktisi týraly kórineý jalǵan habarlaý) bes myń aılyq eseptik kórsetkish mólsherinde aıyppul salýǵa ne sol mólsherde túzeý jumystaryna ne bes jylǵa deıingi merzimde bas bostandyǵyn shekteýge ne sol merzimge bas bostandyǵynan aıyrýǵa jazalanatyny aıtylǵan. 

Eske sala ketelik, budan buryn Atyraý oblysynda jyl basynan beri jol apatynan 5 jasóspirim kóz jumǵanyn habarlaǵan bolatynbyz.