Atyraýda eki kún buryn Jaıyqqa batqan jasóspirimniń múrdesi sýdan shyǵaryldy

<p>ATYRAÝ. KAZINFORM &ndash; Atyraýda eki kún buryn bir otbasynyń eki balasy Jaıyq ózenine batyp ketken bolatyn. Jasóspirimniń biriniń múrdesi sol kúni tabyldy. Al, búgin ekinshisi sýdan shyǵaryldy.&nbsp;</p>

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, jasóspirimniń múrdesi búgin, 22 shildede saǵat 07:50 shamasynda sý betine qalqyp shyqqan.

«20 shildede Jaıyq ózeniniń Kókarna shaǵyn aýdany tusynda 2010 jáne 2011 jyly týǵan aǵaly-inili eki jasóspirim sýǵa batyp ketken edi. Jasóspirimder jabdyqtalmaǵan jerde shomylǵan. Qutqarýshylar 2011 jylǵy jasóspirimniń denesin sol kúni keshki saǵat 19:30-da 4,5 metr tereńdikten shyǵarǵan edi. Al, búgin 2010 jylǵy jasóspirimniń múrdesi oqıǵa ornynan 5 shaqyrym qashyqtyqta sý betine qalqyp shyqty. Jergilikti qutqarýshylar múrdeni shyǵardy», - dep habarlady departamenttiń qoǵammen baılanys toby.

Jaıyq ózenine batqan jasóspirimderdi izdestirý jumysyna tótenshe jaǵdaılar departamentiniń jeke quramynan 15 qutqarýshy, 5 júzý quraly tartyldy.

«Qaıǵyly oqıǵalardyń aldyn alý jáne azamattardyń qaýipsizdigin qamtamasyz etý maqsatynda Atyraý oblysynyń aýmaǵynda shomylý maýsymy áli resmı túrde ashylmaǵanyn habarlaımyz. Sý aıdyndarynyń ruqsat etilmegen jerinde shomylý qaýipti, sońy qaıǵyly jaǵdaıǵa ákelip soqtyrýy múmkin. Sol sebepten, oblystyń turǵyndary men qonaqtaryna saqtyq sharalaryn saqtaýdy, sýǵa shomylýdan bas tartýdy eskertemiz», - dep málim etti departamenttiń qoǵammen baılanys tobynan.

Eske sala ketelik, budan buryn Atyraýda eki jasóspirim Jaıyq ózenine batyp ketkenin habarlaǵan edik.