Atyraýda dronnyń kómegimen Jaıyq sýyna monıtorıng júrgizildi

<p>ASTANA. KAZINFORM &ndash; Atyraý oblysynda Jaıyq ózeniniń sý deńgeıine monıtorıng jalǵasýda. Bul týraly QR Tótenshe jaǵdaılar mınıstrliginiń ókili Asqar Shárip baıandady.</p>

Sý tasqyny jaǵdaıyna monıtorıng dronnyń kómegimen júrgizilýde.

«Bógetterdi nyǵaıtý jumystary jalǵasyp jatyr. Ótken táýlikte Inder, Mahambet, Isataı, Qurmanǵazy aýdandarynda 500 shaqyrymnan astam bóget salyndy. Qulsary qalasynda sý basqan aýmaqtan jyljymaly sorǵy stantsııasy men motopompanyń kómegimen 207 myńnan astam tekshe metr sý soryldy», - dedi QR TJM ókili Asqar Shárip Ortalyq kommýnıkatsııalar qyzmetinde.

Respýblıka boıynsha 38 521 adam óz úılerine oraldy, 6 726 adam evakýatsııalaý pýnktterinde qalyp otyr.

Sý tasqyny bastaǵaly beri 12,9 mln astam tekshe metr erigen qar sýy soryp shyǵaryldy, 7 mln astam qapshyq jáne 1,5 mln astam tonna ınertti materıal tóseldi.

Avarııalyq-qutqarý jáne sý tasqynyna qarsy jumystarǵa 20 myńnan astam adam, 2 772 tehnıka, 335 sý sorý quraly jáne 249 júzý quraly, 7 áýe kemesi jumyldyryldy.

«Buǵan deıin Almaty qalasynan, Qaraǵandy oblysynan Batys jáne Soltústik Qazaqstan oblystaryna kómekke barǵan Qorǵanys mınıstrligi kúshteri men quraldarynyń bir bóligi turaqty ornalasý oryndaryna qaıtarylýda. Qorǵanys mınıstrliginiń áskerı bóliminiń kúshteri Aqtóbe oblysynda jalpy aýdany 403 gektar sý basqan aýmaqta dezınfektsııalaý jumystaryn júrgizdi», - dedi spıker.