Atyraýda bıýdjet qarjysyn jymqyrǵan dırektor men esepshi sottaldy

<p>ATYRAÝ. KAZINFORM &ndash; Atyraý oblysynda eki laýazymdy tulǵa iri kólemde bıýdjet qarjysyn talan-tarajǵa salyp, tanystarynyń esepshotyna aýdarǵan. Sot dırektordyń bas bostandyǵyn 3,6 jylǵa shektep, bas esepshini 7 jylǵa bas bostandyǵynan aıyrdy.</p>

Jylyoı aýdandyq sotynyń aqparatyna súıensek, kinálilerdiń biri J.-ǵa QR Qylmystyq kodeksiniń 189-babynyń 3-bóliginiń 1,2-tarmaǵymen, al Sh.-ǵa 189-babynyń 3-bóliginiń 1,2 tarmaqtary, 189-babynyń 4-bóliginiń 2-tarmaǵymen aıyp taǵylǵan.

— Sh. Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń № 2 Arnaýly áleýmettik qyzmetter kórsetý ortalyǵynyń bas esepshisi jáne ýaqytsha mekeme dırektory mindetin atqarýshy bolǵanyna qaramastan 2021-2022 jyldary óziniń jáne tanystarynyń banktegi esepshottaryna 73 mln teńgeden astam qarjy aýdarǵan. Al basqarma dırektory J. 2022-2024 jyldary 6 mln teńgeden astam qarjyny óziniń jáne tanystarynyń banktegi esepshottaryna aýdarý arqyly ıemdengen. Osylaısha olar asa iri mólsherde senip tapsyrylǵan múlikti ıemdenip, talan-tarajǵa salǵan, -dep habarlady aýdandyq sot.

Prokýror sottalýshy Sh.-ny 6 jyl 8 aı, J.-ny 3 jyl 6 aı merzimge bas bostandyǵynan aıyrý jazasyn taǵaıyndaýdy surady. Jábirlenýshi Sh.-ǵa 60 mln astam teńgege talap qoıýyn qanaǵattandyryp, zań sheńberinde jaza taǵaıyndaýdy usyndy. Sottalýshylar óz kinálaryn moıyndap otyr.

Sot úkim shyǵarar aldynda jazany jeńildetetin mán-jaı retinde sottalýshylardyń kinásin moıyndaǵanyn, buryn sottalmaǵanyn eskerdi. Máselen, Sh. zalaldy ishinara, al, J. zalaldy tolyq kólemde ótegen. J-nyń tergeýge járdemdeskenine jáne jalǵyzbasty ana ekenine nazar aýdaryldy.

— Sottalýshylar taǵylǵan aıyptar boıynsha kináli dep tanyldy. Sh.-ǵa memlekettik qyzmette jáne kvazımemlekettik uıymdarda laýazymdardy atqarý quqyǵynan ómir boıyna, bas bostandyǵyn 7 jyl merzimge aıyrý jazasy taǵaıyndaldy. J.-ǵa QR Qylmystyq kodeksiniń 55-babynyń 4-bóligin qoldanylyp, memlekettik qyzmette jáne kvazımemlekettik uıymdarda laýazymdardy atqarý quqyǵynan ómir boıyna aıyrý, bas bostandyǵyn 3 jyl 6 aı merzimge shekteý jazasy berildi, -dep málim etti aýdandyq sottan.

Sot úkimi zańdy kúshine engen joq.

Eske sala ketelik, buǵan deıin Atyraý munaı óńdeý zaýytynyń eks-dırektorynan 2 mlrd teńge zalal óndirilgenin jazǵan bolatynbyz.